Chieliko 71 - Angami Naga CL (Re-edited) Bible (BSI)

Ketsamia Puo Kecha

¹ Harie, Jihova, a n gei rüzhü baya; mhakipuorei a khapie thenga chüwa hieyi.

² N kemiatho nunu a kelalie mu a shüphraliecie; N nyie kedeipie a kitsa shü di a kelalieyi.

³ No a keya tsiekrie, a kelalieketuo dahou kemetei puo chücie; noe a tsiekrie mu a dahou zocü la.

⁴ Kerüzhümia dzie nunu a kelaliecie, He-i a Kepenuopfü, kelhiekecüko tsiu u rhiekerhuko mu mezhü kemoko dzie nunu.

⁵ Kekreilamonyü, He-i Jihova, no sü a kemerüu, a kepeleu, He-i Jihova, a khriesa nunu.

⁶ A penuolie tse nunu a n vakhriepfü vor; noe a zuo va nunu a se parshü. A n tshe sei tuo zotuo.

⁷ Ae mia kekra la kethekhrükecü puo chü; derei no a keya kekuou zo.

⁸ A tie sü n ketshe bu tshu, zhate n zapuzayie pie pesiya.

⁹ Tsaketa ki a khakegewa hie; a kekuo jüketa ki a khawa hie.

¹⁰ A ngumvümia a dze pucü la, mu a kelhou rü kebako keze mharhü kekieya.

¹¹ Di sie, “Kepenuopfü puo khawate; puo whuo vo puo telie, miapuorei puo kelakeshü jüe ru,” iya.

¹² He-i Kepenuopfü, a kinu petseta hiecie; He-i a Kepenuopfü, a khruo mhailiecie.

¹³ A pejoyakezhako bu menga di jütacie; a pechütuoü pfhü ketuoko bu thetha mu thenga pie u zepfülietacie.

¹⁴ Derei a we n merü sei zotuo, mu n tshe kechü miemie zotuo.

¹⁵ A tie-e n kemiatho mu n kelakelie mhathoko zhate putuo, ae süko si ketseiketso mo shierei.

¹⁶ A we Niepuu, mhatho kezhako tshe vo zotuo; a n kemiatho pu pesituo, n kemiatho rübei putuo.

¹⁷ Harie Kepenuopfü, no a khriesa nunu a pethashüte; siro a tsie ketso rei n mhatho u ngo zocüko pu pesishü tuoya zo.

¹⁸ A tsata mu a tsü rüpouta zo shierei, a khawa hiecie, he-i Kepenuopfü, a bu hasie vorketuo thephou peteko ki n kekuo mu n kezhako pu pesishüwa kemochie.

¹⁹ N kemiatho sü, he-i Kepenuopfü tei pesoko tso, No mha kezhako chükeshüu. Harie Kepenuopfü, supuo n mhiecü ba ga?

²⁰ No a bu keziekere kekra ngushüta rei, no a chü perhei lashü zotuo, mu kijü kesouko nunu no a phou la sesiershü zotuo.

²¹ No a therhu chü pekrashütuo, mu a nou thupeluo lashütuo.

²² N kemiatho la a harp se di ketshe tsali chüpie n ki shütuo, Harie a Kepenuopfü, a lyre se di ketshe tsali chüpie n tshetuo, Harie Israel Kemesau.

²³ A n ketshe tsaliko kechü ki, a tie puo kenei pfü shietuo; mu noe rhakeshü a ruopfüu rei situo.

²⁴ A meü se zhate n kemiatho kekhruohiko putuo, a kepechü pfhüyakezhako bu menga mu u ziekejü chüketa la.