Chieliko 7 - Angami Naga CL (Re-edited) Bible (BSI)

Kemezhü Touu Chüshünu Kecha

¹ Jihova a Kepenuopfü, a n geinu rüzhütuo; a whuo ketuomia pete kinu a kelalie di a shüphrashücie;

² Moliro ukoe losha tuoi a ciechücierhawatuo; ukoe a teshüse tuotatuo, a kelakeshü puorei tuo mo di.

³ Jihova a Kepenuopfü, a haha chüwata üro; a dzie nu kejokemou ba ümharo;

⁴ a mha kesuo pie a zemia gei shü üro; morei puoca kejü nu a ngumvümia vie vapfüta üro;

⁵ ngumvüu bu a whuo di a teliecie; puo bu a kedepie kijü zhüwacie, mu a pie nyophe nu zhüwacie. Selah

⁶ He-i Jihova, n nouyiepfü sielie, a ngumvüko noupfhünouyie perhieketuo la sieliecie: a lanu cosierlie, he-i a Kepenuopfü, noe theca chüshütuoü pepi se bate ru.

⁷ Themia kroko bu vor n houpfü balie; mu kerükrie gei n ba chülie.

⁸ Jihovae themiako capi chütuo; He-i Jihova, a capi chüshücie, a miatho ki ze a nyie pepishücie.

⁹ Kerüzhümia rüzhüu bu puo thela chütacie; sirei kemiathomia we piesieshülie, kemiatho Kepenuopfüe, themia nou mu melou mehoyacü la.

¹⁰ Ukepenuopfüe a zhü zo; puoe u nou kemezhümia kelashüya.

¹¹ Ukepenuopfüe kemiatho capiu zo; mu teisonhie kerüzhümia ngu puo nei motayakezha Kepenuopfü zo.

¹² Rürei lalie kemosie, puoe puo zhiecha kerülietuo; puoe puo theü gapie di dojüse thate.

¹³ Puoe kemeriekecü rünyie dojüse thate; siro puo kekuo re sekecü theütsie dojüse bate.

¹⁴ Mehoshücie, uko mha kesuo rhükecü; mha kesuo pie nuonipfü ketuoko ketijü penuoshüya.

¹⁵ Uko thekhe thielie di uko thuo chükeshüu nu teletaya,

¹⁶ uko mhatho kesuoko rüge la uko tsü gei vortuo; tsiu uko zhosuo chükeshüko uko tsüle gei la tsurtuo.

¹⁷ Jihova kemiatho la a puo tshetuo, mu ketshe tsali chüpie Kerükrietho Jihova za tshetuo.