Chieliko 68 - Angami Naga CL (Re-edited) Bible (BSI)

Ukepenuopfüe U Krü Kejüko Puou

¹ Ukepenuopfü bu sielie, puo ngumvüko bu cüretalie; puo ngumecüyakezhako bu rei puo mhodzü nunu tatalie.

² Mikhu hepfü tatayakezha tuoi uko whuo petawalie; mepfhibuo mi mhodzünu zhatayakezha tuoi kerüzhümia bu Ukepenuopfü mhodzünu katacie.

³ Derei kemiathomia bu u noumvülie, uko bu Kepenuopfü mhodzünu u neilie; U zo, uko bu u nei philiecie.

⁴ Kelipie Kepenuopfü ki shülie, puo za ketshe tsali chücie; chielipie kimhou geinu vorkezhüu ki shülie; puo zae Jihova, puo mhodzünu u neilie.

⁵ U puonuo kejüko puou, samipfüko keyau, süu Ukepenuopfü kemesa chü nu bayakezhau zo.

⁶ Ukepenuopfüe kemenga ketuomia bu u kikruko nu lhoulieya, puo kediemiako ze par kruokelie nu shüya; derei mia perhiepetsoukezhamia we kijü sotocü nu lhouya.

⁷ He-i Kepenuopfü, no n themiako mhodzünu kevo ki, no rayha pfüthe kevo ki, Selah

⁸ kijüu rünietaya, teiko rei Ukepenuopfü tuokecü la rü tsurya; Ukepenuopfü, Israel Kepenuopfü, Ukepenuopfü, Sinai Kepenuopfü la.

⁹ Harie Kepenuopfü, no tei perüpie tshushü, no n kayieu mezieketa ki puo chü kemeteishü.

¹⁰ N themiako sünu lhouketuo ngulie, he-i Kepenuopfü, noe kejüko vaphishü.

¹¹ Jihovae die khashüya; dielie zakeshü kro-u zha zalie;

¹² “Rüpfhünuo mho kedikoe tataya; uko tataya; mu kibapfüko bu mha vakelieko kezalie.

¹³ Uko tekuokroko donu tuo zorei, mekhru puo shü rakachü pie chüpfü; mu puo shütie suna kemeva pie whekepfü tuoi zo.”

¹⁴ Kuokejokejüu sünu kediko whuo kecürekewa ki, Zalmon nu pekrie krüta zo.

¹⁵ Harie, kijüthou kezhau, Bashan kijüthouu; harie, kijüthou kekra keba Bashan kijüthou!

¹⁶ No kiüdi mha ngu n mhikeluya ga? Harie puothou krakecü kijüthou, Ukepenuopfüe ba nyüyakezha kijüthouu, Jihovae kechachie sünu lhouketuo kijüthouu.

¹⁷ Ukepenuopfüe kierbagei kevitho, nyie kercü va kenie; nyienyiekecü se di; Jihovae Sinai geinu puo kemesa chü nu tsur.

¹⁸ No kijü kerükrie gei sie, kedie kechü tezete; mu themiakoe mha pie n ketsüko pielie; n perhiepetsoukecümia kinu zorei; Jihova Ukepenuopfü bu sünu bakecü la.

¹⁹ Teisonhie u pie pfüyakezhau, Jihova tsheliecie, Ukepenuopfü u kelakelieu. Selah

²⁰ Úko Kepenuopfüe kelakelie Kepenuopfü zo; kesia nunu taprakelie-e Jihova u Kepenuopfü vie.

²¹ Derei Ukepenuopfüe puo ngumvüko tsü vütshiewatuo, puo tsütha thenounoupfü di puo kephoumako nu tuocüu rei.

²² Jihovae pushü, “A Bashan nunu uko ze la vortuo, a dzükezha kesouko nunu uko ze la vorshütuo;

²³ N bu n phi pie thezie rheketuo la, sidi n füko meü bu rei ngumvümia kinu u ya ngulieketuo la.”

²⁴ Harie Kepenuopfü, no mesümede di tuo kevo ngu, a kediu, sidi kemesachü nu kelie.

²⁵ Tsali kechüko rie, tsali kesiko nuo, rüümia tambourin kekrei di metsuo nu tuo:

²⁶ “Mechükehou nunu Ukepenuopfü tsheliecie; Jihova, He-i no Israel dzüluou!”

²⁷ Benjamin seyie kecütho bu rie, Juda kedinuoko, Zebulun kedi nuoko, mu Naftali kedi nuoko puo kro chü.

²⁸ He-i Kepenuopfü, n kekuo kieshücie, n kekuo pesishücie, he-i Kepenuopfü, no hamhodzü hie la chükeshü tuoi.

²⁹ Jerusalem nu rüsuokiu la kediko mha se vor n tsü.

³⁰ Tekhrieko donu ketuo nhachüko ruoshücie; thudo kro-u nu thuü nuonuoko keba seyieko sa. Shükeiraka kemehouko kedewacie; terhü u neiyakezhako whuo kecürewacie.

³¹ Ijipt nunu mese se vorcie; Ethiopia bu puo dzie yha mhapie Ukepenuopfü tsücie.

³² Kelipie Kepenuopfü ki shüliecie, harie kijüu kedirüvieko, ketshe tsaliko chüpie Jihova ki shülie. Selah

³³ Nnhiennhie nu tuoketa teiko gei bayakezhau ki shülie; harie, rünyüshücie, puoe puo pfhe phrashüya, puo ratsa kereu.

³⁴ Kekuo pie Ukepenuopfü tsülie; puo kevi Israel mho baya, tsiu puo kekuoe teiko gei baya.

³⁵ Ukepenuopfüe u ngo, puo kemesachü nu Israel Kepenuopfüu, kekuo mu kemeguo pie puo themiako tsüya. Ukepenuopfü bu thetshekepfüu chücie!