Chieliko 66 - Angami Naga CL (Re-edited) Bible (BSI)

Ukepenuopfü Mhatho Kezhako la Puo Ketshe

¹ Kenei pfhephra chüpie Ukepenuopfü tsülie, kijü pete;

² Puo za zayieu pie kelishülie; puo ketshe chüpie zapuzayie chüshülie.

³ Ukepenuopfü ki haikecü pulie, “N mhathoko u ngo zalie! N kekuo kezha nunu n ngumvüko u thuo u khapie n khro shüwatuo.

⁴ Kijüu pete n rüsuoya, mu kelipie n ki shüya; uko tsali chüpie n za tsheya.” Selah

⁵ Vor di Ukepenuopfü mhathoko mehocie; puo mhathoko ha chüüphou mhodzünu kemerie!

⁶ Puo dzükezha chüpie kijü keso chüshü; uko phi se kerüko pfüthe vo. Sünu puo la hie neilie.

⁷ Puo kekuou nunu puoe kechachie diya; puo mhi-e seyieko meho baya; mia perhiepetsoukezhako bu u thuo u chü pezhata hie. Selah

⁸ Harie themiako, Kepenuopfü tsheliecie, puo ketshe pfhe mia bu sicie.

⁹ U kerheiro pekruse kerheiko donu bayakezhau, puo u phi bu tsierhieta mo.

¹⁰ Harie Kepenuopfü, no hie dojüwate, rakachü chü kemesakecü tuoi hie dojüshüte.

¹¹ No hie ze vor dorü nu shü, no thepie pie hie chie gei shüshü.

¹² No mia bu hie tsüko gei tuo; hie mi mu dzü rei pfüthe vo, derei no hie ze vor thechü kemeya puo nu shüshü.

¹³ A kethe ruosuoko se n ki nu vortuo; a phrakeshüko chüshütuo;

¹⁴ A kemezhiekelie ki a tie-e phrakeshüko, a me-e pukecüko.

¹⁵ A khunuo keluoko pie kethe ruosuo chü n tsütuo, tsiu tekuochüko kethe ruosuo mikhu se; thudoko mu temvüko se ruosuo chüshütuo. Selah

¹⁶ Vor di rünyüliecie, Kepenuopfü preiyakezha khe, sitse ae puo a la kedipuo chüshü shicüko pushütuo.

¹⁷ A a tie nunu shiepie puo ki shü; mu a meü se puo pu pezhashü.

¹⁸ A nou nu a mha kesuo leya liro, Jihova a pfhe rünyü mota zotuo.

¹⁹ Derei Ukepenuopfüe rünyülieta tou zo; puo a kecha pfheko rünyülie.

²⁰ Ukepenuopfü bu thetshekepfüu chücie, puo a kecha meliewata mo, morei a kinu puo kekhrie seta mocü la.