Chieliko 65 - Angami Naga CL (Re-edited) Bible (BSI)

Ukepenuopfü Kijü Chü Penyikeshüu Ketshe

¹ He-i Kepenuopfü, Zion nunu n ketshe pfhe chütuo; mu phrakeshü die chüpie n ki shütuo.

² Harie, mia kecha rünyüyakezhau, themia pete n ki vortuo.

³ Puotou kemo chükewako; hie zepfükelie ki, no hie kekrükewako vashüya.

⁴ No puo kedalie di puo bu n penuo vokeliemia kenei ngulieya, puo bu n kiluo nu lhoulieya. Hie n ki, n kemesa rüsuokiu, keviko geinu hie neilietuo.

⁵ Noe kemiatho mhatho u ngocüko se di hie kelashüya; harie hie kelakelie Kepenuopfü; noe kijü kela pete mu dzükezha kepecietho nu ketso kemerüu.

⁶ N kekuo pie kijüthouko chü kemeteikelieu; kekuo pie n chie phapfü.

⁷ Dzükezhako pfhe, mu dzü rüpfhüko pfhe bie kemekriewayakezhau, tsiu themia bouübikecüko rei.

⁸ Kepecietho nu lhou ketuoko rei n zasiko ngukeshü ki u ngotaya; noe khise mu theva kevo kharuko bu u nei di shiekhouilieya.

⁹ Noe kijüu meho, mu dzü pie puo vashüya, no puo chü penyi phishüya. Ukepenuopfü rüu nu dzü tshu ba; Noe telha pie themia tsü, siketuo la noe mezashü eru.

¹⁰ No khoupoko chüshü, no dzü pie khouhieko rei vashü, no teirüpie süko va kemeneshü, no japie sünu lhou kesierko tsüshü.

¹¹ No n kemephruokemevuo pie teicieu keditsüre chüshü; mu n chako mha kevi bu puo ketshu chü.

¹² Rhayhako nu perituoko nu ketshukelhuo; mu kijükhruko kenei pie u thuo u pha kemetei.

¹³ Tekuokroko bu phiechüko zepfütuo; razhako rei telha pie puo rütso chü; uko kenei pfü shiekhouiya.