Chieliko 64 - Angami Naga CL (Re-edited) Bible (BSI)

Ngumvümia Kinu Yalienu Kecha

¹ A panyakecü pfhe rünyüshücie, harie Kepenuopfü, ngumvümia keprei nunu a kerheiro pekrushüyi.

² Mha kesuo chükezhako kepekhre mharhüko nunu a kevieliecie; kejokemou chü tuoyakezhako nunu rei;

³ uko meü kerüpie zhiecha tuoi, tsiu uko die kepfhü theütsie üse mharü baya.

⁴ Uko rüshü di kejo kejüko peya; uko mia pe mhaishü, michie mo zo di.

⁵ Mha kesuo kechü la uko tha tsalieya; uko pekhre di kebie pethoutuoü kerüchüya; ukoe, “Supuonie úko ngu ta?

⁶ Supuonie we thezho varhuokecüko pfhülie ta? We menuo se di thedo rhüliete,” si. Themia nou mu melou ha soukecü la.

⁷ Derei Ukepenuopfüe theü ciepie uko vatuo; uko va kerüza mhawatuo.

⁸ Uko meü la puoe uko biewatatuo; sidi uko pekaperuowatuo; mu mia uko kengu khe merie di pe zotuo.

⁹ Themia pete michietuo, di Ukepenuopfüe chükeshüko putuo, sidi puoe chükeshüko letuo.

¹⁰ Kemiathomia bu Jihova nu u neiliecie, mu puo geinu rüleiliecie. U nou kemezhümia pete bu u nei pie zapuzayie chücie.