Chieliko 60 - Angami Naga CL (Re-edited) Bible (BSI)

U Rümia Petsouketuo la Kekhruo Kecha

¹ Harie Kepenuopfü, no hie meliewate, no hie keyako biephrowate, no n nou meyiete; hieko phou lashücie.

² No kijüu chüpie puo bu pe zoshüte; no süu ciekhoshüte; puo ketseketsako ketso lashücie, süu rünie baketa la.

³ No n themiako bu mha kere ze kesete, no hieko bu krie di meluketa zu khashü.

⁴ No n preiyakezhako la pfhelha puo piesieshü; süu geinu theütsieko therhielieketuo la. Selah

⁵ N kekhriemia shüphralieketuo la, n dzie n zatsa bu kuokelie khashü mu hie pfhekhoshücie.

⁶ Ukepenuopfüe puo kemesachü nunu pushüte, “A kuokelie nu a nei di Shekem kezawatuo, mu Sukot razhau rei mejü kezawatuo.

⁷ Gilid a vie mu Manasseh a vie; Efraim rei a tsüreu, Juda sü a kedi theu.

⁸ Moab sü a dzieteikhou, a phikou kelhoupie Edom gei shütuo; a Filistia mho kuokelie pu shietuo.”

⁹ Supuonie a ze vo dahou kechü rünau nu shü ta? Supuonie a cha tha ze Edom nu vo ta?

¹⁰ Harie Kepenuopfü, no hie meliewata mo üme? No hie rüpfhünuoko ze praya mote, he-i Kepenuopfü.

¹¹ Hie ngumvümia petsouketuo la kekhruo kha hie tsüyi; themia kinu kekhruohiu we kemethuo ze ru!

¹² Ukepenuopfü ze di hie thepfu se di mhachütuo; puoe hie ngumvüko kedewatuo.