Chieliko 59 - Angami Naga CL (Re-edited) Bible (BSI)

Ngumvümia kinu Kelalienu di Kecha

¹ A ngumvüko kinu a shüphrashücie, He-i a Kepenuopfü; a petsou kesierko kinu a yaliecie.

² Mha kesuo chüyakezhako kinu a shüphrashücie, tsiu thezie kepekrumia kinu a kelaliecie.

³ Ukoe tsie rei a kerheiro la ba zo; kekuoko kezekesuo rhü a petsou thate. A kekrü morei mouwa mo zorei, He-i Jihova.

⁴ A jo mo shierei uko ta vo u keselie di a petsou bate. No cosierlie di a khruohishü mu mehoshücie.

⁵ Mu no, Jihova, krodiko Kepenuopfü, Israel Kepenuopfü. Seyie kekreiko pete pejoketuo la sieliecie; thezho kevarhuo kerüzhüko puorei ngumezhieshü hiecie. Selah

⁶ Uko teisozhü vor di ruopie tefü tuoi baya, sidi nadiu nu whi tuoya.

⁷ Mehocie, uko me nunu ruo di; uko tie nu die kere puya; ukoe lecü, “Supuonie u pfhe si ta?” iya.

⁸ Derei no we, O Jihova, uko krenyü zotuo; no seyieko pie kethekrewatuo.

⁹ Harie a kekuou, a n khremerü batuowe; Ukepenuopfüe a kudau ze ru;

¹⁰ Ukepenuopfüe puo kela kejü kekhrie nunu ze kesetuo; Ukepenuopfüe a bu kuokelie mhi se a ngumvüko mehotuo.

¹¹ Uko dukhriwa hiecie, a themiako bu rükra mota rei si lhomu, n kekuo üse uko biepie khrukhruwalie, mu uko sekewalie; He-i Jihova, hie zhüu.

¹² Uko me nu kephouma mu uko tie nu dieko la, uko kemiakokecü nunu uko maliecie. Uko mia rüpfhürüse mu ketijü die kepu la.

¹³ Noupfhü nunu uko pejüwalie, uko jüta kemochie pekawacie. Sitse Jakob Kepenuopfüe kijü vala ketso diyaücü silietuo. Selah

¹⁴ Uko teisozhü vor ruopie tefü tuoi baya, sidi nadiu nu whi tuoya.

¹⁵ Uko kecüca pfhü di rühou kho mu ke tuoya, mu uko kelhuo ngulie moro u nei kemo keruo chütaya.

¹⁶ Derei a we n kekuo pu kelituo; uwe, a we khise gei n ketseikevi pu keli petoshütuo. A kemezhiekelie nhie noe a dahou mu a keyau chü kevor la.

¹⁷ A kelipie n ki shütuowe, harie a kekuou; He-i Kepenuopfü, noe a dahou puo kela kejü kekhrie kenyi Kepenuopfücü la.