Chieliko 58 - Angami Naga CL (Re-edited) Bible (BSI)

Kerüzhümia gei Khepu Kecha

¹ Nie puotoukecü zho khashüya me, terhuoko? Nie thetou nu mia capi chüya zo me?

² Mo zo, n melou nu noe kekrükecü rhüya; n dzie-e kijü nu mia kemvü kechü petsüpetheshüya.

³ Kerüzhüko we nuobvü nunu cha vajo tuote; uko penuolie tsenu kekrüya, tijütaya.

⁴ Uko tinyhü therei tuoi; uko puo nyieto mekapfü ketuo nyhübvü tuoi;

⁵ sidi u meshüketuomia pfhe siya mo, keli puo ketsi kebamia pfhe siya mo.

⁶ Uko me nunu uko hu dutshewacie, Harie Kepenuopfü; losha nuonuoko hu phewacie, He-i Jihova.

⁷ Uko bu dzü zetayakezha tuoi ze jütacie; mia bu kedekewa nha tuoi di uko bu rüwitacie.

⁸ Uko bu noula tuoi ze jütacie; nuope kemo yopuo tuoi niaki ngu moketa tuoiwalie.

⁹ N galikoe zohuko le kepar silie kemonu, kepejo shierei, tu keba shierei, khriewhi-e chüseketa tuoi zo!

¹⁰ Khepu liekelie kenguki kemiatho-u u neituo; puo kerüzhüko zie nunu puo phi khrütuo.

¹¹ Themiae sie, “Kemiathomia la zhakhra kevi puo ba zo ketho, kijüu nu Ukepenuopfü capi ba ketho zo,” icü putuo.