Chieliko 57 - Angami Naga CL (Re-edited) Bible (BSI)

Kepechümia kinu Kelashünu Kecha

¹ A ngumezhieshücie, he-i Kepenuopfü, a ngumezhieshücie; a ruopfüe n kinu rüzhülieyakezha la; n shükhro nu a rüzhülietuo, kepekau rükrierükhriekecüu tuota kemochie.

² A Kepenuopfü Kerükrietho-u ki melieshü; a la mha pete chüshüyakezhau Ukepenuopfü ki.

³ Puoe teigei nu ketseshü di a kelalietuo, a kede kebako bu thenga chütuo. Selah Ukepenuopfüe puo kela kejü kekhrie mu puo kedietho ketseshütuo.

⁴ A ruopfüe loshako donu zhü; süko u medasuo di themia tecülieya; u huko rüngou mu theütsie zo; mu uko meüe zhiecha puoü kevi mhie.

⁵ He-i Ukepenuopfü bu teiko mho rei kerükrieu chücie, n zayieu bu kijü pete mhocie.

⁶ Ukoe kebie pethoupie a phichako nu zhüte; a ruopfüe rünuo tsuta. Ukoe thekre puo thiepie a cha nu zhü; uko thuo te süu nu lete. Selah

⁷ A meloue chüsechü ba zo, he-i Kepenuopfü, a meloue chüsechü ba! A keli mu ketshe tsali chütuo.

⁸ Coliecie, a ruopfü! Colie, lyre mu harp! A teiso kesoushütuo.

⁹ Themiako donunu a n tsheshütuo, He-i Jihova; seyieko donunu a ketshe tsali chüpie n ki shütuo.

¹⁰ N kekhrie kela kejüu zhapie teiko tso, mu n dietho-u rei kimhouko tso.

¹¹ Teiko mho rei kerükrieu chücie, He-i Kepenuopfü; n zayieu bu kijü pete mhocie.