Chieliko 55 - Angami Naga CL (Re-edited) Bible (BSI)

Kelhiekecüko Pekawanucü Kecha

¹ A kecha rünyüshücie, He-i Kepenuopfü; a mezhiekemelo ki n kevielieta hieyi.

² A pfhe rünyücie, di a pfhekhoshüyi, a panya a noukenyü chü bate.

³ Kekreilamonyü ngumvümia pfhe la mu kerüzhümia pfheüla. Ukoe kemezhiekecü pie a gei shü, mu uko noupfhünouyie se a mecüya.

⁴ A nou nu a meloue chüthor bate; tsiu kesia keprei rei a gei tsurte.

⁵ Kemichie mu pekecü a gei vorte, mu kemerie chükecüe a mhapfü bate.

⁶ Mu ae sie, “O, a bu rei mekhru tuoi a shü nyicü we; a pruota di rüleitatuomu ru!”

⁷ Harie, sicü we a thu kepetsera votatuo, sidi rayha nu batatuo. Selah

⁸ A teikhrie khriedi kehe nunu rükri ta rüzhükelie chü nu votatuomu.

⁹ He-i Jihova, uko kebouwa mu uko diepuko kebvüwacie; ae nadiu nu zhosuo mu kegeikecü ngukecü la.

¹⁰ Teisoteizei uko süu dahouko nu whi baya zo; mha kebvükeboukecü mu kemezhiekecüe süu nu ba.

¹¹ Kerüzhüe süu metsuo nu ba, mia kese mu thedo kesuoe puo chadiko nunu lataya mo.

¹² A pu pesuo kebako ngumvümia ücüwe, a süu hielietuomuü; morei a ngu kemecükoe kerüzha ücüwe, a süko kinu zowe rüshütatuo.

¹³ Derei süko monyü, no a ze puo kechüu, a khrietho-u, a dzieseu zo.

¹⁴ A bu n ze a nei kevor-u, avu kepeza krodi ze Kepenuopfü kinu voyakezhau thuote ru!

¹⁵ Kesia bu uko gei votacie, uko bu perhei Sheol nu tsucie; kerüzhüe uko kiko nu mu uko donu ba zocü la.

¹⁶ Derei a Ukepenuopfü kieya; mu Jihovae a kelashütuo.

¹⁷ Thevatie rei, tsiu khise mu khinhieluo rei, ae kecha chü mu meloshü; mu puoe a pfhe rünyülietuo.

¹⁸ Terhü chü a petsou keba nunu puoe a bu rüzapfü mo di a kelashütuo; a perhieketuoko kra phita.

¹⁹ Thiedzütho nu tuoketa Ukepenuopfü, Selah thuo rünyü di uko mese chüshütuo; ukoe rüdishüya mocü la, tsiu Ukepenuopfü preiya kemo la.

²⁰ A zakrokoe u dzie pie u khriethomia u gei shüte, sidi a ze dietseidiekho varhuowa.

²¹ U tie we thunudzükhie ki rei menekuo, derei u melou nu we terhü; tier ki rei mejukuo, derei süko zhiecha zupie keba kro puo zo.

²² N pie lhoupie Jihova gei shüwalie, siro puo n se balietuo; puo mhakipuorei kemiathomia bu rünielie lho.

²³ Derei, harie Kepenuopfü, no uko bu kepeka thekheu nu ketatuo; thezie kemenguko mu mia keseko u kelhouzha tietsa rei lhoulie lho. Derei a we n pele zotuo.