Chieliko 51 - Angami Naga CL (Re-edited) Bible (BSI)

Kejo Vashünu Kecha

¹ He-i Kepenuopfü, N ketseikevi ki ze a ngumezhieshücie, n kekhrie nouzhie kezha ki ze a kemouko vashücie.

² A kejokemouko khrü kemesa mpouwacie, mu a kephouma nunu a chü kemesashücie.

³ A rei a kemouko sita zocü la; tsiu a kephoumako a mhodzüki ba seite.

⁴ N petsou di, n rübei gei, a phoumawate, mu n mhodzüki suo ücüu sü chüwate; süla no we die pu sie rei mezhü zo, tsiu capi chü kesie ki mesa zo.

⁵ Harie, a we kephouma nunu a penuolie, mu kephouma nunu a zuoe a lhoupfülie.

⁶ Noe thenoutsatie ketho-u menguya; süla kepekhre thenou mhasiu a tsücie.

⁷ Hisop pie a chü kemesashücie, sitse a mesalietuo; a khrüwacie, siro a pekrie ki krakuotatuo.

⁸ A chüpie a bu kenei mu thedzükezie rünyücie; noe bietshekewa ruko bu u neiliecie.

⁹ A kephoumako nunu n zie kevielieyi; mu a kemouko pete va phrewacie.

¹⁰ Thenou kemesa puo chüpie a nou shüshücie, harie a Kepenuopfü, tsiu thenou kemezhü mu puotoukecü ruopfü kesa puo a tsücie.

¹¹ N mhinguki nu a kelhouwa hiecie; mu a kinu n kemesa ruopfüu seta hiecie.

¹² N kelakelie keneiu pie a tsü lashücie; mu chüüze nyükecü ruopfüu pie a piesieshücie.

¹³ Sitse a n chako pie kejokechüko pethashütuo, mu kephoumako thenou kedi n kitsa vorlietuo.

¹⁴ Thezie kepekru nunu a kelaliecie, he-i Kepenuopfü, a kelakelie Kepenuopfü; tsiu a meüe n kemiatho pu keli petoshütuo.

¹⁵ He-i Jihova, a tie khrüshücie, sitse a tie n ketshe pesishütuowe.

¹⁶ Noe ruosuo n neiya mo, kemo we a süu khashütieciü; no kethe ruosuo n neiya mo.

¹⁷ Ukepenuopfü bu lielie kesü ruosuo sü thenou tseütsakecüu, tseütsa mu thenou suokelie, Kepenuopfü no süu meliewalie lho.

¹⁸ N kenei nunu mha kevi chüpie Zion gei shülie; Jerusalem dahouko chü pesieshücie.

¹⁹ Siro noe puotou tseikecü ruosuo, thepie ruosuo kechü n nou va pemvülietuo, sitse ukoe thudoko pie n ruosuoba geinu ruosuo chüshütuo.