Chieliko 50 - Angami Naga CL (Re-edited) Bible (BSI)

¹ Kekuo Ukepenuopfü, Jihovae niakithu kepar nunu kele ketso, kijüu ki mha pu mu kieya.

² Zivi lotsocü Zion geinu, Ukepenuopfüe zieshü.

³ Úko Kepenuopfü vorya, puo kemekrie baya mo, mi puoe puo mhodzü mha the baya, puo khieümhouko rükrierükhrie tuoya.

⁴ Puoe puo themiako nyie kecüketuo la tei pesoko kieshütuo, mu kijü rei satuo.

⁵ “A kemesako pfhü kengupie a ki shüliecie; ruothoruori chü di a ze dietseidiekholieketako!”

⁶ Siro teiko puo kemiatho pesishüya; Ukepenuopfüe capiu ze ru. Selah

⁷ “Rünyüliecie, harie a themiako, sitse a mha pushütuo; harie Israel, a n kepetsou die pushütuo; ae Kepenuopfü, n Kepenuopfü zo.

⁸ N ruothoko la a n kerhie ba mo: morei n kethe ruosuoko rei la mo, sükosü a mhodzüki ba seiya zo.

⁹ A n kinu thudo puo rei lie morei vi, morei n mvü kroko nunu mvüdoko shierei,

¹⁰ Kekreilamonyü ketsa nu nhachü kehoupuorei a vie zo, tsiu kiri kijüthou nyienyie gei ketuoko rei zo.

¹¹ Ae kijüthou gei ketuo perako pete si ba; tsiu nha nu ketuo khunuo pete a vie.

¹² “A merüta shierei, a n ki pulie lho; kijüu mu sünu ketuo pete a vie ze ru.

¹³ A thudoko chü cüya me? morei temvü zie krieya me?

¹⁴ Ketshe ruosuo chüpie Kepenuopfü tsüliecie; mu Kerükrietho-u ki n die phrakeshüko chüshüliecie.

¹⁵ Kemezhiekelie ki a kieliecie; sitse a n kelashütuo, mu no a chü kemeyietuo.”

¹⁶ Derei kerüzhümia kiwe Ukepenuopfüe pucü: “No a zhoko phrüketuo n mezhü kirapuo ba ga? Mu a dietseidiekhoko pie n tie nu shüse ki ta?

¹⁷ Noe dieze mecüya, mu a dieko kelhoupie n sietsa shüwaya zo.

¹⁸ No kerügumia puo ngu ro, puo ze kediekholieya, mu pieü kechüko ze puo chütaya.

¹⁹ “No n tie kekha mo di pie kesuou tsüya, mu n meü mha kese rhüya.

²⁰ No balie di n kepenuomia kepetsou die puya: sidi n thuo n zuo nuou ketha die puya.

²¹ No hakoha chüwate, mu a kemekrie ba zo; no we a üse n mhie thenyüsie di leya. Derei a n kerhieya, mu theda pie n mhodzünu shüya.

²² “Tsie hauha leliecie, nie Kepenuopfü rükra motayakezhako, mo üro a bu nie ciechücierhawa, di miapuorei kelakeshü jütatuo!

²³ Ketshe ruosuo khashüyakezhamia a rhuya; tsiu cha puotouu nu tuoyakezhamia, ae Kepenuopfü kelakelieu pie puo pekieshütuo.”