Chieliko 5 - Angami Naga CL (Re-edited) Bible (BSI)

U Yalienu Kecha

¹ Harie, Jihova, a dieko rünyüshüyi, mu a meheimelokecü leshücie.

² A kekra pfhe rünyüshüyi, a kediu mu a Kepenuopfü; a n ki chaya.

³ He-i Jihova, no khise gei a pfhe siya. A khise a dze se n ki pu, di pfhe baya.

⁴ Kekreilamonyü noe kerüzhü n neiya kemo Kepenuopfü, mu kesuou rei n mhodzünu balie kenjü.

⁵ Kemiakokezhako n mhinguki thalie lho; no mha kesuo chüyakezha pete ngumecüya.

⁶ No tijümedayakezhako pekawatuo. Jihovae mia zie lie kenyümia mu kecürümia rütseya.

⁷ Derei a we n kekhrie ngukemezhie nunu n kiu nu vortuo; n kemesa rüsuokitsa va di nuketsushütuo, n khrüprei nu.

⁸ Jihova, a ngumvüko la n kemiatho-u nunu a cha thalieyi; n chau chü kemezhüpie a mhodzünu shücie.

⁹ Uko tie nu kedietho ba mo; uko nou ro kerüzhü rübei; uko mezha sü mekhru kecie puo zo; uko meü se mia tsheya.

¹⁰ He-i Kepenuopfü, uko kemou uko bu pfücie, uko bu uko dorhüko ze tetsutacie; uko kejokemouko la uko kelhiwacie; ukoe n perhiepetsouketa la.

¹¹ Derei n peleyakezha khe bu we u neilie; uko bu kenei pfü shie sei balie. No uko yashücie, n za khrieyakezha khe bu n geinu u noumvü philieketuo la.

¹² Harie Jihova, noe japie kemiathomia tsüya; noe n kekhrie üse pezhü puo tuoi uko yalieya.