Chieliko 49 - Angami Naga CL (Re-edited) Bible (BSI)

Kinyi Pele Suo

¹ Themia peteko, nie hau rünyüliecie; kijüu nu lhou ketuo peteko, nie nyie kedeishücie.

² Kerünuou rei, kerükrieu rei, kenyiu rei, kejüu shierei kemhie zo.

³ A tie-e mhakesi die putuo; a nou mha kemedo rei mha kesikele nu zotuo.

⁴ A a nyie kedeipie mhasi rünyütuo, a mhasi kesau pie harp nunu vatshashütuo.

⁵ Kiüdi puotei kesuo ki a michieta ta? Kerüzhümia a kepechüko a houpfükelie ki,

⁶ u kinyi pelekezhako, u kinyi kekra kebako se kemelhaya mu?

⁷ Miapuorei puo thuo puo kerheiro rhakelie jü zo, morei rhakelie ma pie Ukepenuopfü tsülie kenjü zo!

⁸ Kerheiro rhaketuo mae re ze ru, süu mhapuorei chü di tsokelie jü.

⁹ Sidi puo bu kechachie rhei tuolieketuo, mu mekhru ngu molieketuo la.

¹⁰ We mhakesimia ngukecü, uko rei siataya; kenyau rei, puo mhasi kejüu rei keze kataya, di u kinyiu kekreimia dzie nu votaya.

¹¹ Uko noule ki zo we, uko kiko kechachie batuoü, mu uko kebachüko rei thephou pete gei votuoüya, kijüko pie uko thuo uko za nu thoya.

¹² Derei themia puo puo ziviko nu ba zolieya mo; puo rei katayakezha nhachüko mhie zo.

¹³ Haha ze, kenya thepfu chü kebako dze sü hai zo; u thuo u le u nei kebako rei si zo. Selah

¹⁴ Sheol nu shüwaketuo la tekuo tuoi uko kedaliete; kesia bu uko kepfheu chütuo, sidi ukoe mezhü mekhruu nu tsutatuo, uko rhiko jütatuo, Sheol-e uko kebachü chütuo.

¹⁵ Derei Ukepenuopfüe Sheol kekuo nunu a rhalietuo; puo a zelie zotuocü la. Selah

¹⁶ Mia huo mhanyikelie ki michieta hie, uko kinyi kra selieta zorei.

¹⁷ Kekreilamonyü puo siaketa nhie mhapuorei se tuotalie lho, puo kinyiko puo siemedzi tsulie lho.

¹⁸ Puo kerhei ki puo thuo puo kelhou tshetuo shierei, n thuo n la kevi chükeshü ki mia n tsheya ze ru.

¹⁹ Uko vo uko puonuoko ze puo chütatuo; uko mhakipuorei kezieu ngu lalie lho.

²⁰ Themia puo puo ziviko nu ba zolie mo, nhachü katayakezhako mhie zo.