Chieliko 47 - Angami Naga CL (Re-edited) Bible (BSI)

Ukepenuopfüe Kijüu Pete Kediu

¹ Dziedaliecie, nie themia peteko; Kuokelie pfhe shiepie Ukepenuopfü ki shülie!

² Kerükrietho Jihovae kemeriecü la; kijü pete mho kedi kezhau zo.

³ Puoe themiako biepie u khroshüwatuo, mu seyieko bu u phikhrotatuo.

⁴ Puoe uko la thekau kedapie u tsü, puo khrieyakezha Jakob mholieu. Selah

⁵ Ukepenuopfüe shie di khote, Jihovae ketsü kekhou pfheu ze di.

⁶ Ketshe tsali chüpie Ukepenuopfü ki shülie, ketshe tsaliko chülie; ketshe tsali chüpie u Kediu ki shülie; ketshe tsaliko chülie.

⁷ Ukepenuopfü kijü pete kediu zocü la, mhale di ketshe tsali chülie.

⁸ Ukepenuopfüe seyieko mho di ba; Ukepenuopfüe puo kemesa kedibau gei ba.

⁹ Seyieko kedi nuonuokoe Abraham Kepenuopfü themiako chü di vo kenguliete. Kijü nu pezhükoe Ukepenuopfü viecü la; puo chü kerükrie philiete!