Chieliko 46 - Angami Naga CL (Re-edited) Bible (BSI)

Ukepenuopfü U Ze Tuo Zo

¹ Ukepenuopfü sü hie keyau mu kekuou zo, tsopfhükelie ki mia khruohi seiyakezhau.

² Süla hie michielie lho, kijüu puo thuo rüdita zorei, tsiu kijüthouko thuo te dzükezhako metsuo nu vota shierei;

³ dzüko thuo meho mu rübvürübieta zorei, kijüthouko shü kenieta zorei. Selah

⁴ Sünu kerü puo keba dzükrukoe Kepenuopfü nadiu nou chü pemvüya, Kerükrietho-u bayakezha kemesa chüu.

⁵ Kepenuopfüe nadiu nu baya, süu bu rünielie lho. Kepenuopfüe puo khruo pezishü zotuo.

⁶ Seyieko rübvüta, kediu rüvieko rünieta; puoe puo pfhe phrashü ru kijüu zeta.

⁷ Krodiko Jihovae hie ze tuo; Jakob Kepenuopfüe hie keyau. Selah

⁸ Vor di Jihova mhathoko mehocie, puo kepeka se kijüu gei vorkeshüko.

⁹ Puo kijü vala ketso rei terhü kechüko khawa; puo theüu cietshewa, mu rüngouu bietshe kreiwa; puo mi nunu kierbageiko thewa.

¹⁰ “Zei-i balie, di ae Kepenuopfü ücü siliecie, seyieko donunu a chü pezhalieya, kijüu nu a chü kerükrielietuo.”

¹¹ Krodiko Jihova hie ze tuo; Jakob Kepenuopfü hie keyau. Selah