Chieliko 45 - Angami Naga CL (Re-edited) Bible (BSI)

Kediu Nuyie Tsali

¹ A noue mha kevi caü bu puo tshu ziepfü zhü; ae kediu la zopie kebako pushüzhie; a meü sü leshü thu kesimia puo kethusei zo.

² Themia nuonuoko donu noe kezivitho; ngukemezhie rupie n tie nu shüwate; süla Ukepenuopfüe kechachie japie n tsüwate.

³ N zhiecha pie n do gei khelie, Zayie mu mesümedekecü se di.

⁴ Ketho-u la, kemezhü rüguo ketuo la, n kezha nu tuo zo volie; n dzie n zatsa pie mha kemeriekecüko chü pekieshüyi.

⁵ N theütsiekoe kediu ngumvüko melou zepfü ba; themiako te n khro tsutaya.

⁶ Harie Kepenuopfü, n kediba sü telhekechachie tuoyawe; n kedi theue kemezhü thewe.

⁷ No kemiatho n nei mu kerüzhü mecüya. Süla Ukepenuopfü, n Kepenuopfüe kenei tier se n kenhe pie n kromia mhoshüwate;

⁸ n pfhenei pete-e mür, mu aloes mu kasia re zo, tsohu pie kechü kedikiko nunu puorhü kechü üboukoe n nou chü pemvü.

⁹ N ki nu thenu therhuko donu kedimia nuopfüko sa, n zatsae Ofir nu kedipfü suna se di thaya.

¹⁰ Rünyüshücie, harie rüüpfü, sidi leshü mu n nyie kedeishücie; n themia mu n puo ki rükra motalie;

¹¹ sitse kediu n zivi mehoutatuo; puoe n niepuu ze ru, puo mhodzünu nuketsulie; mu no puo rhulie.

¹² Siro Turmiakoe mha se n nei chütuoü vortuo; kenyithoko rei mhaneiü se, n nei chütuoü vortuo.

¹³ Suna se dokecü rütso pie puo ropfü di kediu nuopfü puo kibou nu ba.

¹⁴ Puokhu neiü pie kethu pfhenei se di ze kediu ki votuo; puo dziese rüü phouseko, süsienu puo zakroko bu puo ze n ki vortuo.

¹⁵ Thenou mvü mu u nei siei di ze votuo; uko bu kediu kiu nu letuo.

¹⁶ N puonuoko mese nu n nuonuoko bu thatuo, noe uko bu kijü pete nu kedimia nuonuoko chütuo.

¹⁷ A n za chüpie thephou pete bu rükraketuo puo chüshütuo; süu la themiako telhekechachie n tshetuo.