Chieliko 42 - Angami Naga CL (Re-edited) Bible (BSI)

Ukepenuopfü Mengupie Terhü Zokecü

¹ Chüzhie-e krukezhü rücü dzü menguyakezha tuoi, a ruopfü rei n mengu kelhoyalie, harie, Kepenuopfü.

² A ruopfüe Ukepenuopfü mengu di terhü tuoya, rhei ketuo Kepenuopfü, a bu kicükipuo Ukepenuopfü mhingu nu vor thalie ta?

³ A mhidzüko pie teisoteizei a ca chü bate; sirei uko zhate a ki, “N Kepenuopfü kirapuo ba ga?” siya.

⁴ A hako rükrakeshü ki, a ruopfü rushü, a themia kro-u ze vo zo, a uko ze Ukepenuopfü ki nu vo, kenei mu ketshe pfhe chü dinu, kemesa teisozha se keba krodi puo ze di.

⁵ Kiüdi n thesuoya mu? Harie a ruopfü; tsiu kiüdi a nou nu rüleilie mo ba ga? No Ukepenuopfü khremerü zolie; a we puo tshe zotie ru, puo a kekhruohiu.

⁶ Mu a Kepenuopfü, a ruopfüe a nou nu puo thesuo siei bate; süla a Jordan mu Hermonko kijü nunu n rükralie, siro Mizar kijüthou nunu rei zo.

⁷ N dzüvoko pfhe nunu kesoue kesou kie; n dzükerüpfhüko, mu dzü kerütheko pete a mho vote.

⁸ Sirei Jihovae khinhie gei puo ketseikevi khashütuo, tsiu theva gei puo tsali a ze balietuo, mu a kechau pie a kerheiro Kepenuopfü ki shü.

⁹ A Kepenuopfü a tsiekrieu ki putuo, “No kiüdi a rükra mota ga? A ngumvümia a kepese la a bu kiüdi kra zo tuotieya mu?”

¹⁰ Kesiashie rüza puo a gei keba tuoi a ngumvüko a kerhieyie; uko teisonhie a ki, “N Kepenuopfü kirapuo ba ga?” isi baya zo.

¹¹ Kiüdi n thesuoya mu? Harie a ruopfü; tsiu kiüdi a nou nu rüleilie mo ba ga? no Kepenuopfü khremerü zolie; a we puo tshe zotie ru, puo a kekhruohiu mu a Kepenuopfü zo.