Chieliko 41 - Angami Naga CL (Re-edited) Bible (BSI)

Mhachükezhümia Kecha

¹ Kejümia rüli rükrayakezhau thejakepfütho zo; Jihovae kemezhiekecü teiki puo kelashüya.

² Jihovae puo pekrushü mu puo perheishütuo, tsiu uko üse kijü nu u neikezhako ütuo, süko khapie u ngumvümia medo nu shüwalie lho.

³ Jihovae kemezhiekecü zhü gei rei u chü pekuoshüya; uko mhachükezhü ki no uko chü keshürhoshüya.

⁴ A sie, “Harie Jihova, a ngumezhieyi, a chü keshürhoshücie, a n gei phoumawatemu.”

⁵ A ngumvümia a gei kelhie di, a kicükipuo siatatieya, mu a za jütatie shi ituoya.

⁶ Uko vor a mehocü ki, ketheracü die puya; uko melou nu mha kesuo kengu baya; uko chazou pra di sü pu keza tuoya.

⁷ A ngukemecüko pete a ngukemvü die kenoupuya; uko a bu suotatuoü medoya.

⁸ Ukoe a üse mha kere se puo puo kupfüliete, puo tsie we zhüte mu la sielie lho icü leya.

⁹ A khrietho, a puo pele kevor-u, a niekhrüda kecüu zorei, puo phitshü pie a petsoute.

¹⁰ Derei Jihova, no we a ngumezhieshü zocie, sidi a phoushüyi; a bu uko zhadavü lashüketuo la.

¹¹ No we a ngu n neiyacü, a ngumvümia bu a mho kuolietaya kemo, a hau geinu siliete.

¹² A la we, a kedietho ki ze no a pesieshüte; sidi a khapie n zie mhodzüki ba seiliete.

¹³ Jihova Israel Kepenuopfü bu thetshekepfüu chücie, kechachie nunu kechachie ketso. Amen mu Amen.