Chieliko 39 - Angami Naga CL (Re-edited) Bible (BSI)

Bajülieya Kemo Kelhou

¹ Ae, “A a chako nu menuolietuo, di a meü se phoumawa molietuo; kerüzhümia a mhodzü ketuo ki, a kiertiekha puo pie a tie kekhalietuo,” ishü.

² A melie mo mu zei ba, kemekrie ba zorei, süla vilie mo; mu a nousuou rekuota.

³ A melou a nou nu le parta; a mhale keba ki miu tu parta, sitse a meü die pushü.

⁴ “He-i Jihova, a bu a thelau silieyi, tsiu a teisozhako kichiepuo shicüu; a kelhou kidepuo ta vi shikecü a bu siliecie.

⁵ Harie, no a teisozhako chüpie pfü puo dewate, mu a kelhouzha rei n mhodzüki we mhathopuo mo. Ketho zo, kehoupuorei hakeshü puo zie mo. Selah

⁶ Ketho, themia ha mhakhrü puo kemhie zo; uko kemethuo puo nu meyhumezhie tuoya zo, puo kinyi pfhepie ba, sirei supuoe süko pielietie shi siya mo.

⁷ “Siro Jihova, a bu kedipuo pfhe sa ta? A kemerü sü n gei bacü zo.

⁸ A kejokemouko pete nunu a kelashücie; a chüpie kenyako krenyü puo chü zowa hiecie.

⁹ A kemekrieta, a tiegashü mota; no n thuo pie siwate ru.

¹⁰ A kinu no a vükecüu chüwatacie; n dzie a vücüko la a tuo motazhie.

¹¹ “Noe themia puo kejokemou la puo kerhie mu pethashüya, siro shülhe-e cüwayakezha tuoi noe puo kinyi cü pejüwaya; ketho zo, themia kehoupuorei hashü kevi puo phre hu zo. Selah

¹² “A kecha rünyüyi, harie Jihova, mu a kekra rünyücie, a mhidzüu gei kemekrieta hiecie. A we n mhodzünu rüsomia; mu solhimia puo zocü la, a puonuoko pete tuoi.

¹³ A lhieshücie, a bu a nei lalieketuo la, a tuota mu jüta kemonu.”