Chieliko 38 - Angami Naga CL (Re-edited) Bible (BSI)

Kemezhie Kebamia Puo Kecha

¹ Harie Jihova, n nei kemo nunu a kerhie hieyi; morei n noupfhünouyie nunu a pechü di petha hieyi.

² N theütsieko a gei lete, mu n dzie a negetsapfü ba zo.

³ N nouyie la, a mo shürho ba mote, a kephouma la a ruko nu rei keshürho ba mote.

⁴ A kejokemouko a tsü gei vote; thepie kemesi puo tuoi uko a la mesithorte.

⁵ A kenya la a rüzapfüko ciepie kerütse chüte.

⁶ A rühou tsute, a zerepfü tsu zhüte, a zhate krate.

⁷ A dobo nu a the bate; a chü gei keshürho puorei tuo mote.

⁸ A thachü mu tseütsate, a nou meheimelocü la a bu ruorüite.

⁹ He-i Niepuu, a kemengu pete sü n mhodzünu ba; mu a meheimelocüu rei n kinu pekhrewa mo.

¹⁰ A melou toutoui mu a kekuo jüte, mu a mhi kezie zorei a kinu tuote.

¹¹ A khrieko mu a zeko rei a kechü la petsete; a zanuoko rei petse nu thate.

¹² A kerheiro pfhü ketuoko a la kebie pethoupie ba; mu a pechütuoü ketuoko mha kesuoko pu tuote; tsiu zhate kecürüdo le baya.

¹³ Derei nyievümia tuoi a mhapfhe si kemopfü chü, mu die pulieya kemomia tuoite.

¹⁴ Ketho, a mia pfhe siya kemomia tuoite, mu mia die kelaya kemomia tie tuoite.

¹⁵ Harie Jihova, a n pfhe baya, he-i Niepuu, a Kepenuopfü, noe die kelashütuo.

¹⁶ Süla a chaya, “A bu uko nei krawa hiecie, a tsierhiekelie ki u neiyakezhako bu.”

¹⁷ A krüta nyünuo ba, mu a noukesuo a mhodzüki tuo zo.

¹⁸ A a kejokemou phrashü, a kephoumae a keyhukezhiete.

¹⁹ A ngumvüko rheirhiei mu kuo; tsiu puoca kejü nu a mecüyakezhamia kra sete.

²⁰ Mha keviu la kesuo chüshüyakezhako rei a ngumvümia zo, ae vi ücüu medziyakezha la.

²¹ A khawa hiecie, he-i Jihova, a Kepenuopfü, a kinu pecieta hieyi.

²² Kenourhei sier a khruohicie, he-i Niepuu, a kelakelieu.