Chieliko 37 - Angami Naga CL (Re-edited) Bible (BSI)

Kerüzhümia la Khrukhre Kemo

¹ Mha kesuo chüyakezhako la n nou chü kemezhie hie; morei kejo chüyakezhako ngu n ro rei hie.

² Nha tuoi süko rüwi mhaitatuocü la, mu gajo tuoi süko ratatuo.

³ Jihova pelelie, mu mha kevi chülie; silie ro no kijü nu lhoulietuo, mu khrukhre di n nei batatuo.

⁴ Jihova geinu n neilie, sitse puoe n nou kemenguko kha n tsütuo.

⁵ N chau khapie Jihova tsülie, mu puo pelelie, sitse puo süu chüshütuo.

⁶ Tsiu puoe n kemiatho se par kezie mhieshütuo, mu n kemezhü chüpie khinhieluo mhiewatuo.

⁷ Jihova geinu rüleilie, mu pfhe terüpfü balie; u cha nu kruolieyakezhau la n nou kemezhie hie, mha kesuo rhülie di chüyakezhau la rei.

⁸ Nouyie nunu kethelie, mu noupfünouyie khawalie; meyhumezhie rei hie, süue u cha thapie kesuotsa rübei shüwaya.

⁹ Kerüzhüko we dawatuo; derei Jihova khremerü kebamia we kijüu welietuo.

¹⁰ Doyopuo sie kerüzhüu ba motatuo, u, no puo chü pfhü shierei, puo ba motatuo.

¹¹ Derei thenou kemeneko we kijüu welietuo; mu uko noune nunu uko nei phitatuo.

¹² Kerüzhüue kemezhüu ngukemvü rhü, di puo gei puo hu thegeipie baya.

¹³ Jihovae kerüzhüko krenyüya, puoe süko teisozha vorkezhü ngu keba la.

¹⁴ Kerüzhüu puo zhiecha zulie, mu puo theü gapie ba, kejü mu ketsopfhüu kelhouwatuoü, tsiu lhou mezhü tuoyakezhako dukhriwatuoü.

¹⁵ Uko zhiecha thuo uko melou nu letuo, mu uko theüko rei tseütsatatuo.

¹⁶ Kemiatho keduoyo kebau kerüzhümia kinyi kekra ki vikuo.

¹⁷ Kerüzhümia bouko tseütsataketuo la; derei Jihovae kemiathomia piesieshüya.

¹⁸ Jihovae kemezhümia teisozhako siya, mu uko kayie rei kechachie zotuo.

¹⁹ Uko puotei vi kemo ki mengatalie lho, mu pekriekecü ki rei uko u tshupfü batuo.

²⁰ Derei kerüzhümia kaüjütatuo, mu Jihova ngumvüko we lieko zivi mhie zotuo; uko mikhu tuoi jütatuo, uko jü thetatuo.

²¹ Kerüzhümiae mha thepulie di su lashüya mo, derei kemiathomia we mia ngumezhie di mha pie mia tsüya.

²² Jihovae japie u ketsüko kijü welietuo; mu u rüsekewamia dathewatuo.

²³ Jihovae mia puo ngu puo neilie üro; Puoe süu phichako chü kemeteishüya.

²⁴ Hie phi mesülie rei tetsulie lho, Jihovae hie dzie teshü tuoyacü la.

²⁵ A nhicu chü tuo ru tsie we phichüte; sirei kemiathomia khakewa ngu mo, morei puo nuonuo khruocüketuo rei ngushü mo.

²⁶ Puotei pete nu puoe mia ngumezhie phiya, mu mha pie mia thepuya, mu puo nuonuoko rei thejapfüya.

²⁷ Kesuou nunu rüreilie, mu mha kevi chülie, sitse no kechachie lhou tuolietuo.

²⁸ Jihovae kedietho-u puo neiyacü la, puo kemesako khawalie lho. Kemiathomia kechachie pekruse baya; sirei kerüzhümia nuosenuoyie we dawatuo.

²⁹ Kemiathomia kijüu welietuo; mu sünu lhou sei tuotatuo.

³⁰ Kemiathomia tie-e mhasi puya, mu puo meüe kemezhü puya.

³¹ Puo Kepenuopfü zhoe puo melou nu tuoya; puo phichako puorei tsierhietalie lho.

³² Kerüzhüue kemiathoko, dukhriwaketuo pfhüterü tuoya.

³³ Jihovae puo khapie süu dzie nu shüwalie lho, mu puo nyie kecükecü ki rei puo pejowalie lho.

³⁴ Jihova pfhe balie, mu puo cha ze tuolie, sitse puo n bu kijüu welieketuo la n chü pezhashütuo, kerüzhüko dakewa ki no süu ngutuo.

³⁵ A kelhiekecüko mia pesekecü ngu, rükriepie Lebanon sedar bo tuoi;

³⁶ A tuo la vo, ru puo jüte, mu a puo pfhü, derei puo ngulie kenjüta.

³⁷ Vi tseicümia phi terü balie, mu u nou kemezhümia meho balie, sicümia thelau sü noune zo.

³⁸ Derei thezho kevarhuoko we peka phrewatuo, kerüzhümia thelau we dathewatuo.

³⁹ Derei kemiathomia kelakelie we Jihova kinu vor; kemezhiekecü ki puoe uko kekuou zo.

⁴⁰ Tsiu Jihova uko khruohishüya, mu uko kelashüya, puoe kerüzhümia kinu uko shüphrashü mu uko kelashüya, ukoe puo peleyakezha la.