Chieliko 36 - Angami Naga CL (Re-edited) Bible (BSI)

Themia Kerüzhü

¹ Thezho kevarhuoe kerüzhümia melou nunu u rüchüya; uko mhiki Ukepenuopfü keprei tuo mo.

² Uko mhiki uko thuo uko tshe di mia uko kejo ngulie kenjü üya.

³ Uko tie nu dieko sü kejokemou mu mia kese phre zo; sükoe mhasilieketuo mu mha kevi chüketuo khakegewate.

⁴ Uko zhü nunu mha kesuo rhüya; uko thuo u khapie vi kemo cha nu shüya; uko mha kesuo ngumecüya mo.

⁵ Harie Jihova, n kekhrie ngukemezhie-e vo teiko tso; n diethoe vo kimhouko tso zo.

⁶ N diethoe kijüthou kezhako mhie zo; n capikoe kesou kezha mhie; harie Jihova, noe themia mu khunuo pekru phreshüya.

⁷ Harie Kepenuopfü! n kekhrie ngukemezhieu kide vi shi! Süla themia pete n shükhro nu kerülei ngulieya.

⁸ N kiu nu kinyiko se ukoe thehethehie chüya; mu noe uko bu n kenei rüu nunu krieya.

⁹ Kerhei dzüluou n kinu tuocü la; n kezieu nunu hie kezie nguya.

¹⁰ N sikezhako gei n ketseikevi bu tuo zoliecie; mu n kemiatho üse u nou kemezhüko gei shü zo vocie.

¹¹ Kemiakocümia phi bu vor a kede hieyi, mu kerüzhümia dzie bu a whuowa hiecie.

¹² Mha kesuo kechüko tetsu zerepfü zhüte; uko kelhouwate, mu la sielie kenjüte.