Chieliko 35 - Angami Naga CL (Re-edited) Bible (BSI)

Kekhruohi Kecha

¹ Harie Jihova, a petsoukezhako petsoushücie; a ze kegeikezhako ze kegeishücie.

² Pezhü mu u keya rünyie pfülie, di sier a khruohishüliecie.

³ Rüngou rei chülie di a whuo ketuoko cha khawacie; a ruopfü ki, “A n kelakelieu” sishücie.

⁴ A kerheiro pfhü ketuoko bu u ziejü mu thenga chütacie. A pekaketuo rhükezhako bu u ziekejü chü di tsiesietacie.

⁵ Süko bu teikhrie mhodzünu shübe tuoitacie, mu Jihova dielieu bu uko whuowalie.

⁶ Uko cha bu zei mu rünyütalie, mu Jihova dielieu bu uko whuo zhü zolie.

⁷ Puoca kejü nu ukoe a la kebie chüpie zhü, puoca kejü nu ukoe a kerheiro la thekre thiepie zhü.

⁸ Uko le keba nu kepeka bu u gei vortacie; mu kebie keviepie keba nunu uko mawacie; uko bu kepeka sünu tetsutacie.

⁹ Sitse a ruopfüe Jihova nunu puo nei phituo; puo kelakelie nunu puo neituo.

¹⁰ A ru petekoe sie: “He-i Jihova, supuo n mhie ga? Noe puo ki kuo phikecüu kinu kethachüu rei kelashüya, mia vie seyakezhau kinu ketsopfhüu rei kevieshüya,” isituo.

¹¹ Ketijü zhapu sier, ukoe a si kemo pie a da.

¹² Ukoe kevi sou nu kesuo pie a tsüya; a phou kha kemengashüte.

¹³ Derei a we uko mhachükezhü ki, gakhropfhe dzie; a mevo di a thuo a pechü. A zie pesu di kecha chü,

¹⁴ Puo khriethomia, morei puo siezedzüriemia la krakezha tuoi, a krashü, a a tsü pesupie mia puoe puo zuo krü ketuomia puo mhieshü.

¹⁵ Derei a phi mesükelie ki uko keze u neita, uko kepekro di a petsou; a u si kemo kethesü zocü kro puo a petsou te mo zo;

¹⁶ uko puorhi kemo chü a krenyü, mu uko hu thegei pielie di.

¹⁷ Jihova, no kichiepuo meho ba zotieya mu? A kelashücie, a menyümenoukecü nunu, mu loshako kinu a kelhouu rei kelashücie.

¹⁸ Sitse krodikehou nunu a n thezie; themia kekra donu a n tshetuo.

¹⁹ A ngumvüko bu puotou kemonu a ngu uko neita hiecie, morei a mecükezhako bu puoca kejü nu mhite rei hie.

²⁰ Uko vitho dze puya mo, derei uko kijü nu kemekrie tuoyakezhamia petsou di mha kese do rhüya.

²¹ Uko mekuo gapfü a petsou di sie; “Ha! ha! hie mhi-e ngushüte,” iya.

²² Harie Jihova, no haha ngu ba zo, kemekrie bata hiecie; He-i Jihova, a kinu pecieta hieyi.

²³ Sierliecie! Sidi a mezhü dashüketuo la rünieshücie, a lanu, a Kepenuopfü mu a Jihova.

²⁴ Harie Jihova, n kemiatho-u nunu a nyie pepishücie, mu uko bu a la u neita hiecie!

²⁵ Uko bu uko nou nu sie, “Ha! u keleu chüliete” ita hiecie; uko bu, “We puo mezuliete” ireita hiecie.

²⁶ A kemezhiekelie ki u neiyakezhako bu thenga chü mu u ziekejü chütalie; a petsou di u thuo u chü pezhalieyakezhako bu thenga mu therhu kejü dzietalie.

²⁷ A mezhü la u neiyakezhako bu u kenei mu u noukemvü pfü shie di sie, “Jihova bu kemeyieu chüliecie, puo kituou kruokelie puo neiyakezha la” iba zoliecie.

²⁸ Siro a meüe zhate n kemiatho pu mu n tshe sei tha zotuo.