Chieliko 34 - Angami Naga CL (Re-edited) Bible (BSI)

Ukepenuopfü Ketseikevi Ketshe

David Chieli, Puoe Abimelek mhodzünu Kenya Do Chüta di Puo Whuowa mu Puorei Tuoketa

¹ A puotei pete nu Jihova tshe tuo zotuo; puo ketshe sü a tie nu tuo sei zotuo.

² A ruopfü Jihova nunu puo mholie chütuo; thenou kerünuoko süsü si di u neituo.

³ Harie, a ze Jihova chü pezhaliecie, sidi úko keze puo za chü kemeyie khe.

⁴ A Jihova pfhü, ru puo a kecha kelashü, sidi a michie pete nunu a kelalie.

⁵ Puo meholie di zielie, sitse nie zie mhakipuorei mengata molietuo.

⁶ Mhakejü hau melieshü ru Jihova puo pfhe silie, sidi puo mezhie peteko nunu puo kelashü.

⁷ Jihova dielieue puo khrüpreiyakezhako khieümhou houpfü ba di sümia kelashüya.

⁸ Metha di Jihovae vi ücü siliecie: puo gei rüzhükeliemia thejakepfütho.

⁹ Jihova preiliecie, puo kemesako, puo preiyakezhamia tsopfhütalie lho.

¹⁰ Losha nuonuoko rei tsopfhü di merüya, derei Jihova pfhüyakezhamia we tsopfhütalie lho.

¹¹ Vorlie, nhicuko, di a pfhe rünyüliecie; a Jihova khrüprei pie nieko pethashütuo.

¹² Nie supuoe kerhei menguya, mu teisozha kekra rhei ba di mha kevi ngu nyüya ga?

¹³ Mha kesuo nunu u meü kekhalie, mu ketijü kepu nunu u tie kekhalie.

¹⁴ Kesuou nunu talie, di mha kevi chülie; nouneu pfhülie, süu whuo zo volie.

¹⁵ Jihova mhi-e kemiathomia gei baya, mu puo nyie süko pfhe rünyü baya zo.

¹⁶ Jihova zie-e mha kesuo kechümia petsou baya; uko kerükrau bu kijü nu ba motaketuo la.

¹⁷ Kemiathomia kekhruo chakeshü ki, Jihovae silieya; sidi u mezhie peteko nunu u kelashüya.

¹⁸ Jihovae u melou bietshebietshakeshümia penuo baya, sidi thedzüzei ketuoko kelashüya.

¹⁹ Kemiathomia rei kemezhiekecü kra phi; derei Jihovae süko pete nunu puo kelashüya zo.

²⁰ Puoe uko ruko pete pekrushüya; süko puorei tseütsalie lho.

²¹ Kesuoue kerüzhüko gei kesia se vorshüya; mu kemiathoko mecükezhamia pejotuo.

²² Jihovae puo kituoko kelalieya; puo rüzhükeliemia puorei bu jotalie lho.