Chieliko 33 - Angami Naga CL (Re-edited) Bible (BSI)

Ketshe Tsali

¹ Jihova nunu nie neiliecie, harie kemiathoko. Ketshe-e kemezhümia vazhü eru,

² Lyre se di Jihova tshelie, puo rhü ker kenyi harp se di tsali chüpie puo ki shülie.

³ Tsali kesa kelipie puo ki shülie, übou khou si se di chü petoshülie.

⁴ Jihova die-e mezhü zocü la, mu puo mhathomhachü pete-e ketho nunu chü phre zo.

⁵ Jihovae kemiatho mu kethoca puo neiya, kijüue Jihova kekhrie rüdirüli kemo thuo tshupfü ba.

⁶ Jihova die üse teiko chülie, mu puo thesüu pie sünu ketuo krodi pete chülie.

⁷ Puoe dzükezha nu dzüko kengupie dzübouko nu shükewa mhiewa, mu kesouko khapie mhanyabou kiko nu shüwaya.

⁸ Kijüu pete bu Jihova preiliecie, kijü nu kelhou pete bu puo prei puo rhu thaliecie.

⁹ Puoe pushü, mu süu chülie ize ru, puo diekhashü ru, süu metei thata zo.

¹⁰ Jihovae seyie mharhü biepie kemethuo chüwaya, puo themia mharhü bie ketsiesiewaya.

¹¹ Jihova mharhüko kechachie baya, puo nouleko rei thephou pete gei tuo.

¹² Jihova pie puo Kepenuopfü chükelie seyieu thejakepfütho zo, puo kayie chütuo üdi puoe kedakelie themiako rei zo.

¹³ Jihovae teigei nu mha mehoya, puoe themia nuonuoko pete nguya.

¹⁴ Puo kebachü nunu puoe kijü nu lhou keba kheko mehoya.

¹⁵ Puoe uko melou pete rhishü; puoe mhatho pete meho ba.

¹⁶ Kedimia puorei rüpfhünuo krodi la krulieya mo, kekuomia puorei kekuo kezha la krulieya mo.

¹⁷ Krulieketuo la we kier zo rei kemethuo zo, morei puo kekuo kezha üse puo kelashüketuo jü.

¹⁸ Harie, Jihova mhi-e puo preiyakezhako, mu puo kekhrie rüdirüli kemo merü tuoyakezhako gei baya.

¹⁹ Kesia nunu süko ruopfü kelashütuoü, mu pekriekecü nunu sümia perheise balieketuo la.

²⁰ Hie ruopfüe Jihova khremerü ba zo, puoe hie kekhruou mu hie zhüu zo.

²¹ Hie puo za kemesau pelekezha la hie noue puo geinu hie neiya.

²² Jihova, hie-e n merü tuoya, n kekhrie rüdirüli kemo-u bu hie gei baliecie.