Chieliko 29 - Angami Naga CL (Re-edited) Bible (BSI)

Dzü Rüpfhü nu Jihova Pfhe

¹ Pie Jihova tsücie, teigeimiako, zapuzayie mu kekuo pie Jihova tsücie.

² Jihova tsü kezhü therhu pie puo za gei shülie; kemesa ziviu nunu Jihova rüsuolie.

³ Jihova pfhe we dzüko mho rei tuo; zapuzayie Kepenuopfü teikese tuoishü; dzüko mho Jihovau.

⁴ Jihova pfhe-e kuo phi; Jihova pfhe sü kekuo thuo tshu.

⁵ Jihova pfhe-e sedar boko bietshewaya. Lebanon nu sedar boko bietshewaya;

⁶ puoe Lebanon bu thudonuo tuoi prou thalieya; mu Sirion pie nhathu kemedzünuo tuoilieya.

⁷ Jihova pfhe-e mi ratsa kemhie zo.

⁸ Jihova pfhe-e rayha rei shükenieshüya; Jihova pfhe-e Kadesh rayhau rei shükenieshüya.

⁹ Jihova pfhe-e phrieboko bie kerüveshüya, mu ketsako bie peruowaya; mu puo rüsuoki nu mha pete-e “Zapuzayie” isi baya.

¹⁰ Jihovae dzüdi mhogei rei baya; Jihovae kechachie la kediu chü bate.

¹¹ Jihova bu kekuo khapie puo themiako tsücie; Jihova bu vitho theja pie puo themiako tsücie.