Chieliko 28 - Angami Naga CL (Re-edited) Bible (BSI)

Kekhruohi Kecha

¹ A n kieya, harie Jihova, a tsiekrieu, a pfhekho mota hieyi: noe zei-itatuo üro, a bu thekhe nu leketako mhie zotie.

² A mezhiemelokeshü rünyüshüyi, n kekhruohi mengu di chazhie, a a dzie yhapie n kemesa rüsuokitsa va di.

³ A teshüpie kerüzhüko sawa hiecie, mu mha kesuo chüyakezhako, u zanuoko ki kezekevi we pu, derei uko melou nu mha kesuo bacüko ze kesalieta hiecie.

⁴ Uko mhatho kheki sü chüpie uko tsücie, uko mhatho kesuoko ki ze, uko dzie-e chükeshü ki sü ze di ukoe ngulie kesüu chüpie uko tsücie.

⁵ Kekreilamonyü ukoe Jihova mhathoko, morei puo dzie mhathoko rünyüya mo, puoe uko pekawatuo, mu uko piesie lashü lho.

⁶ Jihova bu thetshekepfüu chücie, kekreilamonyü puoe a kecha pfheu rünyüliete.

⁷ Jihova sü a kekuo mu a zhü zo, a noue puo peleya, mu a khruohilietaya, sidi a meloue puo neithor ba; mu a a tsali se puo thezietuo.

⁸ Jihovae puo themiako kekuou zo, mu puoe kenhekelieu la kelakelie kudau zo.

⁹ N themiako kelashüliecie mu japie n seyieko tsücie; uko kepfheu chüliecie; mu kechachie uko pietuocie.