Chieliko 25 - Angami Naga CL (Re-edited) Bible (BSI)

Cha Thashü mu Rüguolienu Kecha

¹ He-i Jihova, a n ki a ruopfü piesieshüya;

² A Kepenuopfü, a n peleya; a bu thenga chüta hieyi; a ngumvüko bu a ki kuolieta hiecie.

³ N khremerü kebako puorei bu thenga chüta hiecie; thezho varhuo u medo kechüko bu we mengatalie.

⁴ N chako pie a pengushücie, He-i Jihova, n chako pie a pethashücie.

⁵ N ketho-u nunu a cha thashücie, mu a pethaliecie, noe a kelakelie Kepenuopfücü la; a zhate n khremerü baya zo.

⁶ Rükrashücie, he-i Jihova, n noushünouzhie mu n kekhrie ngukemezhie; süko thiedzü nu tuote.

⁷ A khriesaki kephoumako rükra motayi, morei a thezho varhuokewako; n kekhrie puo kela kejü se a rükrashücie, he-i Jihova.

⁸ Jihova sü vi mu mezhü zo; süla puoe chau pie kephoumako pethashüya.

⁹ Puo u nou kerünuoko ze kemezhü nu voya, mu puo cha pie süko pethashüya.

¹⁰ Jihova chako pete kela kejü kekhrie mu pelelie sü, puo dietseidiekho mu puo zho kezeko la we.

¹¹ He-i Jihova, n za la a kejokemou vashücümu, süu zhathorte.

¹² Supuonie Jihova preiya ga? Puoe süko bu keda kezhü chau pie uko pethashütuo.

¹³ Süko lhou rüütatuo, tsiu süu nuonuokoe kijüu welietuo.

¹⁴ Jihova ze khrietho kechüe, puo khrükepreimiaya, mu puoe uko bu puo dietseidiekho-u silieya.

¹⁵ A mhinie-e Jihova kitsa tuo seiya; puoe kebie nunu a phi teshüse parshüketuo la.

¹⁶ Rürei a kitsa vashücie, di a ngumezhieshüyi: a a dzüzei mu kemezhie baketa la.

¹⁷ A nou kemezhiekecüko chüwacie: a mezhieko nunu a chüse parshüyi.

¹⁸ A mezhie mu a kechü mehocie; mu a kephouma pete vashücie.

¹⁹ A ngumvüko kide kra shi mehoshücie; mu a ngumecü di zhosuo chüpie a gei keshü kide zha shikecü rei.

²⁰ A pfhe balie mu a kelashücie; a bu thenga chüta hiecie; a n rüzhüyacü la.

²¹ Kemiatho mu kemezhü bu a pekruse baliecie; kekreilamonyü a n khremerü tuo zokecü la.

²² Harie, Kepenuopfü, Israel rhashücie; puo mezhie peteko nunu.