Chieliko 24 - Angami Naga CL (Re-edited) Bible (BSI)

Kedi Kezhau

¹ Kijüu Jihova vie zo, mu sünu keba pete rei; kijüu mu sünu lhou keba pete.

² Puoe süu chüpie dzükezhako mho shükecü la, mu süu kerüko geinu dzeshü.

³ Supuonie Jihova kijükhru gei kho ta? mu supuonie puo kemesa chü nu thalie ta?

⁴ Puo dzie kemesa, mu puo nou kemesamia; u melou pie ketijü nu shüya kemoko, mu tijü di rüse kemoko zotuo.

⁵ Sümia Jihova kinu theja ngulietuo, mu uko kelakelieu Ukepenuopfü kinu mvü kemetei lakeshü ngulietuo.

⁶ Puo pfhüyakezha kro-u gei haiya, Jakob Kepenuopfü, zie pfhükezhako gei siya. Selah

⁷ Nie tsü pengoshücie; harie kharuko, tosieliecie, keriekimia kharuko, sitse zapuzayie Kediu lerlietuo.

⁸ Zapuzayie Kediu supuo ga? kuo mu mecacüu, Jihova! Jihova terhü nu kekuou!

⁹ Nie tsü pengoshücie, harie kharuko! tosieliecie, keriekimia kharuko, sitse zapuzayie Kediu lerlietuo.

¹⁰ Zapuzayie Kedi hau supuo ga? Krodiko Jihova, puoe zapuzayie Kediu zo. Selah