Chieliko 22 - Angami Naga CL (Re-edited) Bible (BSI)

Thenou kesuo Pfhe mu Ketsheü

¹ A Kepenuopfü, a Kepenuopfü, no kiüdi a khawata ga? No kiüdi a khruohi momu a meheimelokecüko nunu pecieta ga?

² He-i a Kepenuopfü, a khinhie gei melieshü, derei no a pfhe si mote: tsiu theva gei rei, derei kerüü ngulie mo.

³ Derei no we mesa, Israel ketshe n gei bakezhau.

⁴ Hie puonuoko n pele; uko pelelie, mu no uko kelashü.

⁵ Uko n kielie, di uko kelalie; uko n pelelie, mu uko bu kemengata mo.

⁶ Derei a we zochü puo zo, themia mo; mia krenyü chü mu mia bu a pese.

⁷ A kengu pete a krenyü, uko tielhi a kie mu tsüge di pucü;

⁸ “N dzeu pie Jihova ki shüshülie, puo bu n kelashücie, puo bu puo noulieu kelashücie!”

⁹ Sizorei noe nuobvü nunu a se parshü; noe a zuo merü gei a pekruse bashü.

¹⁰ A penuokelie nunu a pie n gei balie; a zuo a penuokeshü nunu no a Kepenuopfü zo.

¹¹ A kinu pecieta hieyi, kemezhiekecü a penuo ba, mu kekhruohiketuo puorei jücü la.

¹² Thudo kekra a houpfüliete: Bashan nu thudo kekuoko a houliete.

¹³ Uko u tie gapie a rü ba, puo chüte pfhü di mehoketuo losha tuoi.

¹⁴ A we perukewa dzü tuoite, a ruko pete a kereko ze ba kemo tuoite; a melou mepfhibuo tuoite, süu a merü nunu zete.

¹⁵ A tie sopie litso mhiete; a meü a meco kupfü bate; mu no a khapie kesia nyophe nu zhü.

¹⁶ Tefüko rei a houpfü ba; kerüzhümia kro puo a houpfüliete; A phi a dzieko rüwite.

¹⁷ A ruko pete phrülie vite, uko meho mu a phi terüpfü tha.

¹⁸ Uko a pfheneiko kezalie, mu a pfheneiko pie dapewa.

¹⁹ Derei no we a ki pecieta hieyi, he-i Jihova, a kekhruou, rükri vor a khruohishücie!

²⁰ Zhiecha nunu no a kelhouu kelaliecie; tefüu kekuo nunu a kerheiro-u kelaliecie.

²¹ Loshau tie nunu a kelaliecie! Tsiu thudo kekhrieko kia nunu a kelashüyi.

²² A siezedzürieko ki n zau pie pesishütuo; mechükehouu nunu a n tshetuo.

²³ Nie Jihova kepreiko puo tsheliecie; nie Jakob tsiako pete, puo za chü kemeyieliecie, siro Israel tsiako pete, puo ngupie nie ngoliecie.

²⁴ Puoe kemezhiekezhau mezhie mecü morei rütseta mocü la; a kinu puo zie rei kevieta mo; derei puoe puo kiekeshü ki a pfhe rünyülie.

²⁵ Mechükehou kezhau nunu a n tshetuo; puo preikezhako mhodzü nunu a die phrashütuo.

²⁶ Ketsopfhümia mhacü di u kelhuo chülietuo; Jihova kepfhüko puo tshetuo; nie melou bu kechachie rheituocie.

²⁷ Kijü kela nu ketuo pete-e rükralie di rürei Jihova kitsa vatuo; mu seyie nuolhou pete puo mhodzünu rüsuotuo.

²⁸ Kedi kechü sü Jihova vie zo; mu puo seyieko mho di baya.

²⁹ Kijü nu zeyakezha pete puo rüsuotuo; nyophe nu ketsu pete puo mhodzünu nerhu phretuo; mu a puo la rhei batuo.

³⁰ Siekelhoumia puo rüsuotuo; vorkezhü thephouko ki Niepuu dze putuo.

³¹ Mu penuo vor moluocüko ki puo dze pie shietuo, puoe chüshüketako dze.