Chieliko 20 - Angami Naga CL (Re-edited) Bible (BSI)

Kuolieketuo la Kecha

¹ Kemezhiekelie nhie Jihova bu n die kelashüyi! Jakob Kepenuopfü za bu n yalie thienyü.

² Kemesachü nunu kekhruo ketse n tsü üthienyü, mu Zion nunu n chü pekuoshücie.

³ Puo bu noe khakeshü pete rükracie, tsiu no kethe ruosuo chükeshüko lielie thienyü. Selah

⁴ Puo bu n nou kemenguu chüshü n tsücie, mu n mharhü pete chü tseishücie.

⁵ Hie bu no kuokelie nu hie neicie, mu hie Kepenuopfü za nunu pfhelhako piesieshücie; Jihova bu n kechako pete chü tseishü thienyü.

⁶ A tsie we Jihovae puo thuo kenhekelieu kelalieyacü siliete; kelalieyakezha puo dzie puo zatsa kekuou se di puo kemesa teigei nu puo die kelashütuo.

⁷ Huomia kierbageiko peleya, mu huomia kier peleya, derei hie we Jihova hie Kepenuopfü zau nunu thepfutuo.

⁸ Süko melatatuo mu tetsutatuo, derei hie we sie di tha kemeteilietuo.

⁹ Kuokelie pie kediu tsücie, he-i Jihova, hie n kiekeshü ki hie pfhekhoshücie.