Chieliko 19 - Angami Naga CL (Re-edited) Bible (BSI)

Ukepenuopfü Mhathoko nu Puo Zayie

¹ Teikoe Ukepenuopfü zayie pesishü; mu teimeluoe puo dzie mhatho thashüya.

² Teisoe teiso ki die pu; mu teizeie teizei ki mhasi thashü.

³ Die pu chie mo, u die jü, uko pfhe rei si mo.

⁴ Sirei uko pfhe kijü pete rhüpfü vote, mu uko die kijü kela ketso vote. Teiko geinu puoe niaki la pfheki puo pethoushü.

⁵ Süu yasaue puo kibou nunu kepar tuoi, kekuomia u nei di ta ketuo tuoi.

⁶ Puoe teigei puo kela nunu parzhie, mu puo kewhi thelako ketso; mu mhapuorei puo keleu nunu keviekelie jü.

⁷ Jihova zho sü vi lotso, u chü perheishüya, Jihova zho-ue ketho, miamomia chüpie mhasilieya.

⁸ Jihova keleko mezhü, thenou kenei khashüya: Jihova diekhakeshüko mecümecie, themhi chü pezieshüya.

⁹ Jihova kepreie mesa tsei, kechachie ba seiya: Jihova zho khakeshüko ketho mu puotou phre.

¹⁰ Süko suna ki rei se morosuokuo, u, suna kevitho ki rei; mepfhidzü ki rei mou, mu mepfhidzüda nunu po ketsurko ki rei moukuo.

¹¹ Süko geinu n kituoue u kirilieya, süko se bakelie nu zhakhra kezha ba.

¹² Supuonie süko kekrücü silie vi ga? Kepekhre kejokemouko nunu a chü kemesashüyi.

¹³ Yalie mo di kephoumako kechü nunu n kituou khase balieyi; süko bu a mho kekhata hieyi. Sitse a gei thetha jütatuo, mu kejo kezhako nunu a jo mo tuolietuo.

¹⁴ A tie nu dieko, mu a melou kelekemedoko bu n mhodzünu lielie kesü chücie; Jihova, a tsiekrieu mu a rhakelieu.