Chieliko 18 - Angami Naga CL (Re-edited) Bible (BSI)

David Kuokelie Tsaliu

¹ A n khrieya, He-i Jihova, a kekuou.

² Jihova sü a tsiekrieu, a dahou, mu a shüphrakelieu: A Kepenuopfü, a tsiekrieu a puo gei rüzhükelieu, a zhüu, mu a kelakelie kiau, a kuda.

³ A Jihova za kietuo, puo za tshe kesüu zo, sidi a ngumvüko kinu a kelalietuo.

⁴ Kesia roko a whipfülie, keka dzü rüpfhüko a re vor.

⁵ Sheol roko a phalie; kesia ciephrieko a chakhalie.

⁶ A kemezhiekelie ki a Jihova kieshü, mu a Kepenuopfü ki kekhruo la shieshü. Puo rüsuoki nunu puo a pfhe silie; a shiekhouikeshüko puo nyie tso.

⁷ Süki kijüu mele mu peta; kijüthou mvüdzeko rei mele mu rünieta, kekreilamonyü puo nou meyieketa la.

⁸ Puo nyhüki nunu mi khu sieta; mha kepeka miu puo me nunu par; süue ketsiemizhüko petushü.

⁹ Puoe teiko teshü kerünuoshü ru kerlie: mu zeibouicü puo phizhükhro tuo.

¹⁰ Puo cherub puo gei pfülie di pruota; puo teikhrie shüko geinu pruo vi se sieta.

¹¹ Puoe kezei pie puo kewhe chü puo houlie; puo kewhe puo houpfü kebako sü; dzükezei mu kimhou shüde-icüko zo.

¹² Puo mhodzüki keba kezieu nunu prü mu thezhü mi-e kimhou kesoukezeiko pfüpha par.

¹³ Jihovae teigei nu tei bu seshü, mu Kerükrietho-u puo pfhe phrashü.

¹⁴ Puoe puo theütsieko ketseshü, ru süko ta u thetsera vota, puo teikemelashü di süko penyüwa.

¹⁵ Sitse dzükezha dzüyieko ngu parta, mu noe kerhiekeshü ki, He-i Jihova kijüu mvüdzeko rei ngu parta, n nyhüki thesüu se mhekeshü la zo.

¹⁶ Puoe peso geinu zo tsur, puo a chü pielie; puoe dzükezha nunu a teshü se parlie.

¹⁷ Puo a ngumvü kuo secüu kinu a kelalie, tsiu a ngumecüyakezhako kinu rei zo: kekreilamonyü uko a ki kuothorcü la.

¹⁸ Kepeka a ki kevor nhie uko a petsouta; derei Jihovae a yakepieu.

¹⁹ Puo a ze vor thechü kemeya puo nu shü; puo a ngu puo neikelie la a shüphrashü.

²⁰ Jihovae a kemiatho ki le di a zhakhra chü a tsü; a dzienie kemesa ki ze di a zha chüshü.

²¹ Ae Jihova chako ze tuolie mu kerüzhü zho se di, a Kepenuopfü ze kepecieta mo.

²² Puo die khakeshü petekoe a mhodzü tuo zo, mu a puo zhoko khawa mo zo.

²³ A puo mhodzünu mezhü tuolie, mu kejo nunu a thuo a kha kreipie balie.

²⁴ Süla Jihovae a kemiatho ki ze, mu a dzienie puo mhi ki mesakecü ki ze di a zha chü lashü.

²⁵ Noe diethokecümia gei diethopie pekieya, vi tseicümia gei vi tseipie pekieya;

²⁶ kemesamia ki, no n kemesapie pekieshü; kerüpfhimia ki, no rüpfhicü pie pekieshü.

²⁷ Noe rünuokecümia kelashüya, derei kemiakokezhako we bie kerünuowaya.

²⁸ Noe a mitu petushü; Jihova, a Kepenuopfüe a kezeiu chü pezieshü.

²⁹ N geinu ae rüpfhünuo puorei penyülietuo; a Kepenuopfü geinu ae prou cakha tselie.

³⁰ Ukepenuopfü we, puo cha vi tsei zo: Jihova phrakeshü die sü ketho tsei; puoe puo pelekezha khe zhüu zo.

³¹ Jihova sie Ukepenuopfü supuo ba ga? Siro Kepenuopfü kemo tsiekrie kekrei supuo ba ga?

³² Ukepenuopfüe kekuo pie a chie phakeshüu; mu a cha chüpie khrukhrekeshüu.

³³ Puo a phi chüpie chüzhie phi mhieshüya, sidi a bu a tha kerükrieko gei thalieya.

³⁴ Puo a dzie bu terhü chülieketuo pethashüya, sidi a bounie bu mese theü galieya.

³⁵ No n kelakelie zhü rei pie a tsüshü; mu n dzie n zatsa pie a phou sieshü, n kekhruohi pie a chü pezhashü.

³⁶ Thechü kemeya puo pie a phi khro chapra chüshü; sidi a phi bu tsierhieta molie.

³⁷ A a ngumvüko whuo vo di a uko mhodzü rielie; uko pekawa kemochie rürei la mo.

³⁸ A uko bie khrülie, mu uko sielie kenjüta; uko te a phi khro tsu.

³⁹ No terhü nu la kekuo pie a chie phashü; no a keperhiemia pie a phi khro shüwate.

⁴⁰ No a ngumvüko bu rünoupie a tsü, a bu a ngukemecüko pekawa.

⁴¹ Uko shieshü, derei miapuorei uko kelakeshü jü: Jihova ki rei shieshü zo, derei puo uko khoü lashü mote.

⁴² Süki a uko vütshiepie teikhrie nu nyophe mhie zowa; a chadiko nu nyoba tuoi uko pfhüwa.

⁴³ No mia a perhieketuoko kinu a kelashü; no a chüpie seyieko tsüu chüwa: a u si tuo kemo themia kro puo a lie chü.

⁴⁴ Uko a pfhe sishü mumetha a die zeta: chazoumia u kepepfü a ki vor.

⁴⁵ Chazoumia u nou thachüta, mu michie pe zo di uko kuda nunu par.

⁴⁶ Jihova rhei ba! A tsiekrieu bu thejapfücie! mu a kelakelie Ukepenuopfü bu kerükrieu chücie.

⁴⁷ A khepukeshüu sü Ukepenuopfü zo; mu themiako penyüpie a khroshüshü;

⁴⁸ puo a ngumvüko kinu a kelashü; u, no a pie kerükriepie a kepetsouko mho shü; mia zhosuoko kinu a kelashü.

⁴⁹ Süla a n tshetuo, He-i Jihova, seyieko donunu a n za ketshe tsali chütuo.

⁵⁰ Kuokelie kezha puoe pie puo kediu tsüya, mu kechachie rüdi kemo kekhrie pie puo kenhekelieu tsüya, David mu puosepuoyieko.