Chieliko 17 - Angami Naga CL (Re-edited) Bible (BSI)

Kejo Chü Kemomia Puo Kecha

¹ Kemezhü kecha rünyüshücie, He-i Jihova, a kekra rünyüshücie: mha kese tie nunu par kemo a kechau rünyücie.

² A mezhü bu n ki nunu vorcie, n mhi bu mha puotouu ngu thienyü.

³ No a melou dojüshü liro; no theva vor a meho, morei a nou dojü zorei, mha kesuo ngulie lho zo; a tie bu kephouma chü lhoü pepiliete.

⁴ Kekreimia mhathotsatie liro, n tie nu kepar dieko la, ae mia kechükedekecü cha nu tuo mote.

⁵ A phichakoe n chako zetsa tuo zo, süla a phi tsierhieshü mo.

⁶ A n kieya, he-i Kepenuopfü, kekreilamonyü no a kecha kelashütieru; n nyie kedeipie a tsü di a dieko rünyüshüyi.

⁷ N kekhrie u ngo zocüu pie pekieshücie; mia u ngumvü kesie ki n dzie n zatsa üse n peleyakezhako kelashüyakezhau.

⁸ N mhishülou tuoi a se balieyi; n shükhro nu a kevielieyi,

⁹ a peseyakezha kerüzhüko kinu, a houpfü keba a ngumvüdoko kinu.

¹⁰ Miangukemezhietsatie uko nou khatsapfü baya, uko tie se kemiako secü die puya.

¹¹ Uko a sie pie vor a houpfüliete; a biekhrüpie kijü shütuoü uko mhipie a gei tuote.

¹² Loshae puo chüte mehou keba tuoi, losha kemedzü puoe rüshü mha tetuo ükezhü tuoi.

¹³ Sieliecie, Jihova, uko perhiecie, uko phou kelhouwacie, n zhiecha pie kerüzhümia kinu a kelaliecie.

¹⁴ He-i Jihova, haicümia kinu n dzie pie a kelaliecie: kijü hanu, kelhou ki u ya ngukelieko. No uko la kesepie kebako nunu uko bu uko va ketshu ngucie; uko nuonuoko bu rei u kelhuo ngucie; mu süko nuonuo bu rei u ya ngucie.

¹⁵ A we kemiatho nunu n zie meho tuotuo; a cokelie ki n rhiu ngu di a nei tseitatuo.