Chieliko 16 - Angami Naga CL (Re-edited) Bible (BSI)

Theka Kevi Ngukelie

¹ A yashücie, He-i Kepenuopfü: a n peleyakezha la.

² A Jihova ki puyie, “No sü a Niepuu zo, No zo moro a kevi-e puorei tuo mo.”

³ Kijü ketuo kemesako, uko kevimia zo, a kenei pete uko gei tuo.

⁴ Terhuo kekrei kedalieketako u nousuo chü pekralietaya; uko thezie pie kekrie ruosuo kechüko, a süu perushü lho, morei uko za pie a tie nu rei shülie lho.

⁵ Jihova sü kedakelie a yau mu a hie zo; no a yase baliete.

⁶ A kijü rieko u nei sieicü nu lerte; uwe, a theka kevi puo pie a ya chüliete.

⁷ A Jihova tsheya, puo a tarhoyacü la; theva gei rei a meloue a pethaya.

⁸ Ae Jihova pie a mhodzünu ba seiya; puoe a zatsa keba la a rünielie lho.

⁹ Süla a nou puo neiya, mu a ruopfü rei puo neiya; a phou rei khrukhre ba.

¹⁰ No a ruopfü khapie Sheol nu shüwa lho; morei n kepeleu bu cieürietalie kelho la.

¹¹ No kerhei cha thapie a kieya. N keba nu sü kenei ba tsei; n zatsa we kechachie thenou kemvü ba.