Chieliko 148 - Angami Naga CL (Re-edited) Bible (BSI)

Mhatho Pete Jihova Tshelie

¹ Nie Jihova tsheliecie! Teiko geinu Jihova tsheliecie, kerükrieko geinu puo tshelie!

² Puo tshelie, puo dieliemia pete; puo tshelie, puo rüpfhünuo pete!

³ puo tshelie, khrü mu niaki; Puo tshelie, nie zie keba themvü pete;

⁴ Puo tshelie, kerükrietho teiko, mu teiko mho keba dzüko!

⁵ Uko bu Jihova zau tsheliecie, Puoe diekhashü ru uko chükelie la.

⁶ Puoe kechachie la uko chü piesieliete; puo uko sepie jütalie kelho chüwa.

⁷ Kijü nu Jihova tshelie, nie dzükezha nu khunuoko tsiu kesou pete rei;

⁸ Mi siro prü, pekrie mu thege; khriedi-e, puo dieko chü tseishü.

⁹ Kijüthouko mu kijütsei pete; nhasibo tsiu sedarbo pete!

¹⁰ Nhachü mu perinuo pete; gou ketuo khunuo tsiu pruo ketuo pera!

¹¹ Kijü nu kediko mu themia pete; kedinuoko tsiu kijü nu peyuko.

¹² Khriesako mu rüüko rei; ketsamia tsiu nhicumia rei!

¹³ Uko bu Jihova zau tsheliecie, puo za rübei meyiemeluokecü la; puo zayie-e tei mu kijü mho.

¹⁴ Puoe puo themiako kiau piesieshüte, puo kemesako pete bu tsheyakezhau; Israel nuonuoko, puo penuo ketuoko. Jihova tsheliecie!