Chieliko 147 - Angami Naga CL (Re-edited) Bible (BSI)

Jerusalem Chü Pevikeshü la Ketshe

¹ Jihova tsheliecie! Ketshe tsali chüpie Ukepenuopfü ki keshüe vicü la; sikecüe u nei, mu ketshe-e zivi.

² Jihovae Jerusalem chü piesieshüya; puoe Israelmia u kelhikewako pfhü kengulieya.

³ Puo u melou proketako chü pevishüya, di uko rüzako phashüya.

⁴ Puo themvüko phrüse baya, puo uko za se uko pete kieya.

⁵ U Jihovae zha, mu kuothor; puo mhasi puo kela jü.

⁶ Jihovae mia u kedekewako phou piesieshüya; puoe kerüzhüko pie kijü tsuwaya.

⁷ Jihova thezie di tsali chüpie puo ki shüliecie; harp pepie Ukepenuopfü tshelie.

⁸ Kimhouko pie tei zeshüyakezhau, kijü la teirü chükeshüu, kijüthouko gei nha pelhoukeshüu.

⁹ Puoe nhachüko cava khashüya, shüzha nuonuo ruo kebako la rei.

¹⁰ Puoe kier kekuo puo neiya mo; morei takevimia la rei puo neiya mo.

¹¹ Jihovae puo preiyakezhako, mu puo kekhrie rüdiya kemo gei chüsechü kezhako, puo neiya.

¹² Jihova tsheliecie, he-i Jerusalem! N Kepenuopfü tsheliecie, he-i Zion!

¹³ Puoe n kharu seiko bie kemeteikeshü la, puoe japie n gei keba n nuonuo tsüshüya.

¹⁴ Puoe noune pie n rienu kebako tsüya; puoe thoulha kememhietho-u pie n ketshu chüshüya.

¹⁵ Puoe puo die khapie kijü gei shüya; puo die-e ta vi se zo.

¹⁶ Puoe tekuo mie mhie pekrie khashüya, puoe thege pekrü kezapie mige tuoi shüya.

¹⁷ Puoe mhachu tuoi prü peyieshüya; supuonie puo kemeku mhodzü thalie ta?

¹⁸ Puoe puo die ketseshü di süko chü pezeshüya, puoe puo tei bu rükhrieshüya; tsiu dzü bu kru tsurya.

¹⁹ Puoe puo die pie Jakob pekieshü, puoe chünukecüko mu pethokeshüzho khakeshüko pie Israel tsüshü.

²⁰ Puoe seyie kekrei gei hamhie chü mo; puoe pethokeshüzhoko uko bu si rei mo. Nie Jihova tsheliecie!