Chieliko 146 - Angami Naga CL (Re-edited) Bible (BSI)

Jihova Kemiatho la Ketshe

¹ Nie Jihova tshelie! Jihova tshelie; harie a ruopfü!

² A rhei keba chie Jihova tshetuo; a rhei keba chie a ketshe tsali chüpie Kepenuopfü ki shütuo.

³ N kepele pie kedinuomia gei, morei themia gei rei shü hie, süko gei kekhruohi puorei jü.

⁴ Puo keha tuota tse, puoe kijü nu la votaya; sünhie puo mharhüko rei tuo motaya.

⁵ Jakob Kepenuopfü pie puo kekhruohi chükelieu u keneithomia zo; puo kemerü pie Jihova puo Kepenuopfü gei shükelieu;

⁶ Tei mu kijü chükeshüu; dzükezha mu sünu keba peteko, kechachie ketho-u khapie bayakezhau.

⁷ Mia bu u neketekezhako la kethoca chüshüyakezhau; cava pie kemerüko tsüyakezhau. Jihovae kedieko phreishüya;

⁸ Jihovae mhicieko mhi chü pevishüya, Jihovae nuketsuketako phou piesieshüya; Jihovae kemiathoko khrieya.

⁹ Jihovae sikemomiako pekrulieya; puoe merünuomia mu samimiapfü mengupielieya; derei kerüzhüko cha we bie pesurhuwaya.

¹⁰ Jihovae kechachie dituo, thephou pete la, O Zion, n Kepenuopfü. Jihova tsheliecie!