Chieliko 145 - Angami Naga CL (Re-edited) Bible (BSI)

Jihova Kevi mu Kekuo la Ketshe

¹ A n pu kerükrietuo, a Kepenuopfü mu Kediu; mu a kechachie n za tshe sei tuotuo.

² Teisonhie a n tshetuo, mu kechachie a n za tshetuo.

³ Jihovae zha, tsiu puo tshe phikeshü mese; mu puo kezha sü pfhü ketsokeliepfü mo.

⁴ Phou puoe n mhatho tshepie phou kekreiu ki shütuo, sidi n mhatho kezhako pu pesishütuo.

⁵ A n zapuzayie therhu kezha kerükrie, mu n mhatho u ngocüko medotuo.

⁶ Mia n mhatho kemeriecüko kekuo putuo, mu a n kezha pesituo.

⁷ Mia n kevi kezha rükraketuo putuo, mu n kemiatho-u pu kelituo.

⁸ Jihovae puo zho vi mu mia ngumezhie, puo nou meyie tho, puo noushünouzhie nyi phi.

⁹ Jihovae mia pete gei viya, mu ngukemezhie pie puo mhatho pete mho ba.

¹⁰ N mhatho pete rei n tshetuo, He-i Jihova, mu n kemesako n thezietuo.

¹¹ Ukoe n kedi kemeyie putuo, mu n kekuou keputuo.

¹² Themianuo ki puo mhatho kezha, mu puo kedi kemesü dze puketuo la.

¹³ N kedi-e kechachie keba kedi, mu n rüvie-e thephou pete nu baya. Jihovae puo die pete nu diethoya, mu puo mhatho pete nu ngukemezhie nyi.

¹⁴ Jihovae tetsuketa pete phou piesieshüya, mu nukeketa pete mengu piesieshüya.

¹⁵ Themhi pete n pfhe kelho ba, mu no puotei pete nu cava khashü uko tsüya.

¹⁶ N dzie kelhashü di rhei keba pete mengu chü tseishüya.

¹⁷ Jihovae puocha pete nu miatho, mu puo mhatho pete nu mia ngumezhie.

¹⁸ Jihovae puo kieyakezha pete ketho nu puo kieyakezha pete penuo tuoya.

¹⁹ Puoe puo preiyakezhamia mengu chü tseishütuo, puoe süko pfhe rei rünyü di uko kelashütuo.

²⁰ Jihovae puo khrieyakezha pete pekrulieya; derei kerüzhüko pete pekawatuo.

²¹ A tie-e Jihova ketshe putuo, siro chüüphou chükepfü peteko telhekechachie puo za kemesau tshetuo.