Chieliko 143 - Angami Naga CL (Re-edited) Bible (BSI)

U Kelashü mu Cha Thashünu Kecha

¹ A kecha rünyüshüyi, he-i Jihova, n nyie pie a mezhie rükhruokeshü rünyüshücie! N dietho mu n miatho nunu a pfhekhoshücie.

² N kituou ze ketsokecü nu le molieyi, n mhodzüki we rhei ketuoko miapuorei miatho mo zocü la.

³ Ngumvümia a whuo tuote; a kelhou vüpie kijü shü; a chüpie thiedzütho siaketako tuoi kezei nu a bu ba.

⁴ Süla a ruopfü a geinu phisiate, a melou nu u mekeso chüte.

⁵ A thiedzü teiko rükrashü; n mhatho pete le ba; n dzie mhathoko le medoshü.

⁶ A dzienie chapie n ki shüya, a ruopfü n mengu terhüya, kijü keso puo tuoi di. Selah

⁷ A pfhekho rükrishücie, he-i Jihova; a ruopfü thachüte. A kinu n zie kevieta hiecie, a thekhe nu keketako tuoita rei si lhomu.

⁸ Khise a bu n kekhrie ngukemezhie rünyükelie chüshüyi, a n peleyakecü la: A bu vo kezhü chau silieketuo chüshüyi, a a ruopfü pie n ki piesieshüzhücü la.

⁹ He-i Jihova, a ngumvüko kinu a kelashücie; a kevielienu di a ta n ki vorzhie.

¹⁰ A bu n medo-u chülieketuo a pethashücie; no sü a Kepenuopfü zocü la. N ruopfü vi zocüu bu a cha tha ze kemezhü nu vocie.

¹¹ He-i Jihova, n za la a chü perheishücie; n miatho la kemezhiekecü nunu a ruopfü ze parshücie!

¹² N kekhrie rüdirüli kemo nunu a ngumvüko dathewacie, sidi a ruopfü pechüyakezha khe pekawalie; a sü n kituoucü la.