Chieliko 141 - Angami Naga CL (Re-edited) Bible (BSI)

Kesuou nunu Rüguo Se Balienu Kecha

¹ Jihova, a n kieya; kenourhei a ki vorcie; a n kekie ki n nyie pie a pfhe rünyüshücie.

² A kecha bu n mhodzünu kethengu tuoilie thienyü, a dzie yhakesie bu thevatie ruosuo puo tuoilie.

³ He-i Jihova, a tie kepfhe puo pie bacie; a me kikhau se balie.

⁴ A nou bu kesuo kitsa puorei vo hie, kejokemou chüyakezhako kro nu, kerüzhü mhatho kechü nu vota hiecie; a bu uko ca kelheko rei cü hie.

⁵ Kemiatho-u thuo a vücie, kedietho-u thuo a chü kemezhüshücie. Kerüzhümia tier bu a tsü kenhewa hie zocie, a kechaue uko mhatho kesuoko petsou sei ba zo.

⁶ Uko pie uko pejokecü capiko nu shü tse; uko a dieko rünyütuo, süko u neikecü la.

⁷ Kijü nunu ketsie phro mu bietshiekecü tuoi, sütuoi Sheol me nunu uko ruko kezakeziwatuo.

⁸ Derei a mhi n gei baya zo; He-i a Niepuu, Jihova, a n rüzhütuoü pfhüya; a ruopfü kha kemengawa hie zoyi.

⁹ Mia kebie chüpie kezhü geinu, kesuo kechüko kebie geinu a yashücie.

¹⁰ Kerüzhüko bu u thuo u jal nu letacie, mu a bu we taliecie.