Chieliko 140 - Angami Naga CL (Re-edited) Bible (BSI)

Ngumvümia kinu U Yalienu Kecha

¹ He-i Jihova, themia kesuo kechüko kinu a shüphrashücie; mia kemvü kechüko kinu a rüguoshücie,

² u nou mha kesuo rhüyakezhako kinu, terhü pesie sei tuoyakezhako kinu.

³ Uko tinyhü tuoi uko meütie chü kemetheliete; priele thereiu uko menie khro tuoya. Selah

⁴ He-i Jihova, kerüzhüko dzie nunu a yashücie; zhosuoko kinu a rüguoshücie; ukoe a bu tetsuketuo rhüya.

⁵ Kelhiekecüko a la ciephrie puo pethoupie ba; mu kero pie kechü kebie puo cha khie kelhapie zhü, uko a la thephi kemesü khapie zhü. Selah

⁶ A Jihova ki; “No a Kepenuopfü zo; a mezhiemelokeshüko rünyüshücie, He-i Jihova.”

⁷ He-i Jihova kerükrietho-u, a kelakelie kekuou, rüya zhanhie no a tsü yashüte.

⁸ He-i Jihova, kerüzhüko mengu chü uko tsü hiecie; puo rüzhü doko khruo sashü hie, uko thuo uko le pezhata rei silie lhomu. Selah

⁹ A houpfü kebako, u tsü pfü kerüka thate, uko tie kesuo bu uko zepfülietacie;

¹⁰ mizhü ketu bu te uko gei tsurcie; uko kelhoupie mi nu shüwatacie, uko bu la parlie kelho thekhe kesou nu shüwayi!

¹¹ Mia thayakezhako bu kijü nu uko ba chü hiecie; kesuo kerüzhü bu zhosuoko biekhrüwacie!

¹² Jihovae mia u peseyakezhako yapieketuo mu ketsopfhümia la thezho touu chüshüketuo a si ba.

¹³ Kemiathokoe kethezie pie n za gei shü tou zotuo, kemezhümia n mhodzüki lhoutuo.