Chieliko 138 - Angami Naga CL (Re-edited) Bible (BSI)

Jihova Kekhrie la Puo Ketshe

¹ He-i Jihova, a melou pete se n thezietuo; terhuoko mhodzünu a n ketshe tsali chütuo.

² A n kemesa rüsuokiu petsoulie di rüsuotuo, n kekhrie rüdirüli kemo mu n ketho la a n za tshetuo; noe n die mu n za pie pete mho shülieketa la.

³ Ae kiekeshü nhie, no a pfhe khoshü, sidi a ruopfü kekuo chü penyishü.

⁴ He-i Jihova, kijü nu kediko pete n thezietuo, süko n tie nu dieko sikelie ki.

⁵ Süko Jihova zhoko pu kelituo, Jihova zapuzayie-e zhacü la.

⁶ Jihovae rükrie zoürei, kerünuoko rei rhuya; derei kerüzhakecüko we puo ratsa nu uko siyakezha zo.

⁷ A kemezhiekecü donu tuo zorei, no a perheishü, n dzie chapie a ngumvüko noupfhü petsoutuo, sidi n dzie n zatsa bu a kelalie.

⁸ Jihova kele a geinu tseishütuo, He-i Jihova, n kekhrie rüdirüli kemoe kechachie bayie. N thuo n dzie mhathoko khawa hiecie.