Chieliko 136 - Angami Naga CL (Re-edited) Bible (BSI)

Jihova Kekhrie Ba Seiyakezha la Ketshe

¹ Kethezie pie Jihova tsücie, puoe vicü la! Puo kekhrie rüdirüli kemoe kechachie baya.

² Kethezie pie terhuoko Rhuou Ukepenuopfü tsücie! Puo kekhrie rüdirüli kemoe kechachie baya.

³ Kethezie pie niepuko mho Niepuu tsücie! Puo kekhrie rüdirüli kemoe kechachie baya;

⁴ U ngo phikecü chükelie-e puo zo, puo kekhrie rüdirüli kemoe kechachie baya;

⁵ puoe mhasi nunu teiko chükeshüu, puo kekhrie rüdirüli kemoe kechachie baya.

⁶ Puoe kijüu kelhapie dzüko mho bakelie chüshü, puo kekhrie rüdirüli kemoe kechachie baya;

⁷ puoe kezie zha phikecü chükeshüu, puo kekhrie rüdirüli kemoe kechachie baya;

⁸ khinhie gei dinu niaki chüshü, puo kekhrie rüdirüli kemoe kechachie baya;

⁹ theva gei dinu khrüthemvü chüshü, puo kekhrie rüdirüli kemoe kechachie baya.

¹⁰ Ijipt nu nuorie dukhrikewau, puo kekhrie rüdirüli kemoe kechachie baya;

¹¹ sidi uko donunu Israel ze parkelieu, puo kekhrie rüdirüli kemoe kechachie baya;

¹² puo dzie kemetei mu puo bou pechiese di, puo kekhrie rüdirüli kemoe kechachie baya;

¹³ Kemerie Dzükezhau kho kekreikeshüu, puo kekhrie rüdirüli kemoe kechachie baya;

¹⁴ sidi Israelko bu süu metsuo nu tuo philie, puo kekhrie rüdirüli kemoe kechachie baya;

¹⁵ derei Faro mu puo rüpfhünuoko we kelhoupie Kemerie Dzükezha nu shüwa, puo kekhrie rüdirüli kemoe kechachie baya;

¹⁶ puo themiako cha tha ze rayha nu vokelieu, puo kekhrie rüdirüli kemoe kechachie baya;

¹⁷ kedi kezhako biekewau, puo kekhrie rüdirüli kemoe kechachie baya;

¹⁸ kedi kemeyieko dukhriwa, puo kekhrie rüdirüli kemoe kechachie baya;

¹⁹ Sihon, Amormia kediu, puo kekhrie rüdirüli kemoe kechachie baya;

²⁰ Og, Bashan kediu, puo kekhrie rüdirüli kemoe kechachie baya;

²¹ mu uko kijü pie mia phruowa, puo kekhrie rüdirüli kemoe kechachie baya;

²² pie puo kituou Israel phruowa, puo kekhrie rüdirüli kemoe kechachie baya;

²³ we kemengakecü ki u va rükrakeshüu, puo kekhrie rüdirüli kemoe kechachie baya;

²⁴ sidi ngumvümia dzie nunu u shüphralie, puo kekhrie rüdirüli kemoe kechachie baya;

²⁵ thephou pete cava khashüyacüu, puo kekhrie rüdirüli kemoe kechachie baya.

²⁶ Kethezie pie teigei Kepenuopfü tsücie, puo kekhrie rüdirüli kemoe kechachie baya.