Chieliko 132 - Angami Naga CL (Re-edited) Bible (BSI)

Kemesachüu la Jihova Theja Kecha

¹ Jihova, David mu puo kemezhiekecü pete rükrashücie;

² puo kedipuo kemhie di Jihova ki rüseshü shikecü, mu Jakob Kuokejokejüu ki puo die phrashü shikecü.

³ “A a keba kiu nu le lho, morei rüleilieyakezha a zhü gei pfü lho.

⁴ A mhi bu zelie lho; morei a mhinie bu rüngulie lho;

⁵ a Jihova la thechü puo pfhülie kemochie, Jakob Kuokejokejüu bu baketuo thechü puo pfhülie kemochie.”

⁶ Harie, hie Efratha nunu süu si; Jaar lieko nunu hie süu ngulie.

⁷ “Úko Puo rüsuopfhekiu nu le khe, úko puo phiba kinu rüsuo khe.”

⁸ He-i Jihova, sielie di n rülei chü nu vocie, no mu n kekuo bouu rei sa.

⁹ N zievoko bu kemiatho chü dzielie, tsiu n kepeleko bu u nei di shielie,

¹⁰ N kituou David la, no kenhelieketa zieu ki nu rüreita hiecie.

¹¹ Jihovae ketho nunu David ki rüseshü; puoe sünunu rüreita lho; “A n phou siko donu puo pie n kediba gei shütuo.

¹² N nuonuokoe a dietseidiekho-u, mu a se uko pethashüketuo a ahzako ze tuolieketuo sie; uko nuonuoko rei kechachie n kediba gei balietuo.”

¹³ Jihovae Zion kedalietacü la; Puoe puo kebachü chüketuo la süu mengute.

¹⁴ “Hau kechachie a rülei bau zo, a haki lhoutuo, a hau a nei.

¹⁵ A japie puoca puova gei shü phishütuo; a niekhrüda pie puo kejüu kelhuo chüshütuo.

¹⁶ A kelakelie pie puo zievoko pedzielietuo, mu puo kepeleko u nei di shiekhouituo.

¹⁷ A sünu David kiau bu pou partuo; a puo kenhelieketau la mitubou puo kesese bate.

¹⁸ A thenga pie puo ngumvüko bu dzielietuo; derei puo gei we puo keditsüre ngu zivi phituo.”