Chieliko 121 - Angami Naga CL (Re-edited) Bible (BSI)

Jihova U Seketuou

¹ A tosie kijüthouko mehotuo. A kekhruo sü kirapuo nu vor ta?

² A kekhruo Jihova kinu vor, tei mu kijü chükeshüu.

³ Puo n phi bu rünieta lho; n seketuou rüngutalie lho.

⁴ Israel seketuou rüngu morei zetalie lho.

⁵ Jihovae n seketuou; Jihovae n zatsa keyau.

⁶ Khinhie gei ro teiniaki, theva khrü zorei n bie pesuolie lho.

⁷ Jihovae mha kesuo pete nunu n rüguolietuo; Puoe n kerheiro rüguo se balietuo.

⁸ Jihovae tsie yawinu kenuokenuo ketso, n kepra mu n keler rüguolietuo.