Chieliko 118 - Angami Naga CL (Re-edited) Bible (BSI)

Kuokelie Tsali

¹ Harie, kethezie khapie Jihova tsücie; puoe vi zocü la; puo kekhrie kechachie bayacü la.

² Israel bu pucie, “Puo kekhrie kechachie baya.”

³ Aron kikru bu pucie: “Puo kekhrie kechachie baya.”

⁴ Jihova preiürhuyakezhako bu pucie, “Puo kekhrie kechachie baya.”

⁵ A kemezhiekelie nu Jihova kie, Jihovae a pfhekhoshü di a pie thechü kemeya puo nu shüshü.

⁶ Jihova a kitsa, a michielie lho, chüüphou kepfümia a gei kedipuo chülie vi ta?

⁷ Jihovae a kitsa, a khruohiketuo la; A a ngumvümia mho kuokelie ngu zotuo.

⁸ Themia pelekecüu ki rei, Jihova rüzhükelie we vikuo.

⁹ Kekuo kesemia pelekecüu ki rei, Jihova rüzhükelie we vikuo.

¹⁰ Seyie peteko a houpfülie, Jihova za nunu a uko dathewa.

¹¹ Uko a houpfülie, a khie a mhou pete houpfülie; Jihova za nunu a uko dathewa.

¹² Uko mepfhi kemhie a houpfülie; zohu mi tuoi uko tu par; Jihova za nunu a uko dathewa.

¹³ A ne petoshü, a tetsuta nyünuo zo, derei Jihova a khruohishü.

¹⁴ Jihova sü a kekuou mu a tsaliu; Puoe a kelakelieu chüte.

¹⁵ Kemiathomia pfheki nu kuokelie kenei tsali ba: “Jihova dzie puo zatsa thepfu se di mhachü;

¹⁶ Jihova dzie thezatsa pie kerükrie se siete, Jihova dzie puo zatsa thepfu se di mhachü!”

¹⁷ A siata lho, rhei batuo, sidi Jihova mhathoko pu pesishütuo.

¹⁸ Jihovae siazha pie a pechüshü; derei a pie kesia tsüwa mo.

¹⁹ Kemiatho careko khrüpie a tsücie; a sünu le di Jihova tshetuo.

²⁰ Hauha Jihova careu zo, kemiathomia sünunu letuo.

²¹ A n thezietuo, no a pfhekhokeshü la, sidi a kelakelie chüte.

²² Ki kechükoe vakewa tsieu pie puoke tsie kemeyieu chüliete.

²³ Hauha Jihova mhatho, u mhiki u ngo zo.

²⁴ Teisozha hau Jihova thuo chüshü; hau nu u nei mu u noumvülie khe.

²⁵ Hie kelashücie, hie n ki chaya, He-i Jihova. Hie n ki chaya, Jihova, hie piesieshücie.

²⁶ Jihova za nunu kevor-u thejakepfütho zo. Hie Jihova ki nunu japie nie tsüya.

²⁷ Jihova sü Ukepenuopfü zo, puoe kezie pie u tsüshüte. Seico pie u nei di thaketuoko khe ze, ruosuoba kiako ketso vocie.

²⁸ No a Kepenuopfü zo, a kethezie pie n tsütuo; no a Kepenuopfü zo, a n pie kerükrietuo.

²⁹ Kethezie pie Jihova tsülie, puoe vicü la; Puo kekhrie kechachie bayacü la.