Chieliko 116 - Angami Naga CL (Re-edited) Bible (BSI)

Kesia nunu Kelakeshü la Ketshe

¹ A Jihova khrieya, puoe a pfhe si mu a mezhiemelokeshüko rünyülietakecü la.

² Puoe puo nyie kedeipie a ketsü la a a kerhei chie puo kie tuotuo.

³ Kesia roko a houpfülie, tsiu Sheol mezhieko a telie, a kemezhiekecü mu thenou kesuo dzülie.

⁴ Sitse a Jihova za kie: “Harie Jihova, a n ki chaya, a kelashüyi!”

⁵ Jihovae mia ngumezhie mu miatho; úko Kepenuopfüe mia ngumezhieya.

⁶ Jihovae miamomia pekrushüya; a chü kerünuokeshü ki puo a kelashüya.

⁷ N kerülei nu la votacie, harie a ruopfü; Jihovae n gei tseiüvi phishüwaketa la.

⁸ No kesia nunu a ruopfü, mhidzü nunu a mhi, mu thephi kemesü nunu a phi kelashü.

⁹ A Jihova mhodzünu tuotuo, kerheiko kijüu nu.

¹⁰ “A kemezhie phite,” izo rei, a kepeleu se balie.

¹¹ A a nei kemo nunu, “Themia pete ketijümia zo,” ishü.

¹² A bu kedipuo se Jihova tsü ta? Puo a gei vikeshüko la.

¹³ A kelakelie hieu piesietuo; di Jihova za kietuo.

¹⁴ Themia pete mhodzü nunu Jihova ki a die phrashütuo.

¹⁵ Puo gei diethokezhamia siaketa Jihova mhodzüki puoma re.

¹⁶ He-i Jihova, a sü n kituou; a sü n kituou zo, n zetuopfü nuou. Noe a phako phreishüwate.

¹⁷ A ketshe ruosuo pie n tsütuo, mu Jihova zau kietuo.

¹⁸ Themia pete mhodzünu Jihova ki a die phrashütuo;

¹⁹ Jihova kitiezhako nu, n metsuo nunu, he-i Jerusalem. Jihova tsheliecie.